Byrngem iakhih ka HYC halor ka CM LEAD Fellowship | Dawa thung da ki nong Meghalaya ha baroh 12 ki kam

Shillong, Naitung 27: Ka Hynniewtrep Youth’ Council (HYC) kala byrngem ban pyrshah jur ia ka jingkhot Interview bad kan sdang ia ka jingiakhih lada jia ba ka Sorkar Meghalaya kam pynbeit mardor ia ki kyndon ka CM LEAD Fellowship kaba ai bhah ia ki 4 na ki 12 tylli ki kyrdan na ka bynta ki kyrtong nabar ka jylla.

Ha ka kyrwoh kaba la aiti sha u Myntri Rangbah ka jylla u Conrad K Sangma hynne ka sngi Nyngkong, u President ka HYC u Bah Roy Kupar Synrem ula ong, ba ka jingbhah kyrpang kaba long ‘one-third’ ia ki kyrdan sha ki briew kiba nabar ka jylla ka long kaei kaei ka bym iahap satia bad ka long pyrshah ia ka jingthmu ban tei ia ki jaka treikam kiba don ha ka jylla.

Ka CM LEAD Fellowship, hapoh jong ka SSA-SEMAM, kadei kaba la pynwandur ban buh ia ki samla kiba tbit bad ki bor pyniaid district, Samagra Shiksha, DERT, skul, nonghikai bad ha ki shnong ki thaw kiba don ha kylleng jong ka Meghalaya.

“Kum ia katei ka jingbahkhlieh ka dawa jur ban sngewthuh bniah ia ka jinglong jingman jong ka jylla, ki riti ki dustur tynrai, ka rukom ai iaka synshar khaddar bad ki jingshisha kiba iadei bad ka imlang sahlang bad ka kolshor. Ki samla ka Meghalaya kidei kiba biang tam eh ban shim ia katei ka jingkitkhlieh” la ong ka Council.

Ka HYC kala pynshai ba ka jingpyrshah ka jongka, “Kam dei satia ia ki samla kiba wan nabar ka jylla hynrei pyrshah ia ka polisi treikam kiba pynduhlad ia ki samla kiba dei hok ban ioh ia ki kabu ha ki prokram kiba la bei tyngka da ka sorkar kiba la pynwandur kyrpang na ka bynta ka Meghalaya.”

“Ha ka por ba ki samla kiba la nang la stad kila shem jingeh ban iohkam iohjam bad ban ioh ia ki kabu ban shakri ia ki paitbah, ka sorkar kadei ban pynthikna ba ki sienjam kiba ka shim kin long na ka bynta ban pynroi ia ka Meghalaya bad ban buh hakhmat eh ia ki samla lajong” la ong u Bah Synrem ha ka shithi.

Ka Council kala kyntu ia ka sorkar ban weng noh ia katei ka kyndon ban bhah ia ki 4 tylli ki kyrdan ia ki samla kiba nabar ka jylla bad ban pynthikna ba ia baroh ki kyrdan dei ban pyndap da ki samla kiba dei hok jong ka jylla da kaba iaid katkum ka jingwan shakhmat ka jongki.

Ka HYC kala pynpaw ia ka jingkyrmen ba kan ioh ia ka jubab kaba bha, hashwa ban pynlong ia katei ka Interview ha ka 30 bad 31 tarik u Naitung 2026.

“Hynrei lada ka sorkar ka pulom ha kaban pynbeit noh ia katei ka rai bad shimkhia ia ki jingpynsngew, ka Hynniewtrep Youths’ Council kan ym don shuh da kawei pat ka lad ban sdang ia ka jingiakhih paitbah ban iada ia ka hok tynrai bad ia ka bha ka miat jong ki samla trai jylla jong ka Meghalaya” la maham ha ka shithi.

Ka Council kala bynrap ba ka sorkar kadei ban shim ia ka jingkitkhlieh lada mih kano kano ka jingjia na katei ka jingpulom ka jongka ha kaban shimkhia mardor ia katei ka mat kaba kongsan wat hapdeng jong ka jingai lypa ia ki jingpyntip”.