Shillong, Naitung 26: U Symbud Myntri Rangbah ka Jylla bad National Vice President ka NPP Bah Sniawbhalang Dhar ula ong ba ka sorkar kba ialam da ka NPP kala dep ban map haduh T.850 Klur ia ki kali kamai kiba dang pynshateng ban siew ia ka khajna hapoh ka One Time Settlement Scheme bad ula kyrpad ia ki nongthep vote ka West Jaintia Hills ban kyrshan ia u kyrtong ka NPP Dr DRL Nonglait u uban iakhun ia ka elekshon shiteng samoi Lok Sabha na Shillong Constituency.
Haba kren ha ka jingialang paitbah ha Sutnga, u Bah Dhar uba khmih ruh ia ka Tnad Transport, ula ong ba kila don 1.70 lak tylli ki kali ki bym shim la siew ia ka khajna hadien ka jingwan saphriang ka khlam Covid-19 bad ka jingkhang ia u dewiong bad dieng (Timber) ha u snem 2020. Ka jingsiew baroh kala tam ia ka T.1050 Klur.
“Lada ngi pyntreikam ia ka jinglum khajna, palat 3 lak ngut ki briew kiba shaniah ha ki trok kin duh ia ka jingkamai jakpoh” ula ong.
Ka kynhun myntri kala mynjur ban map noh ia ka 80% ha kiwei pat ki khajna bad 90% ka Fitness Fees.
“Na ka T.1050 Klur, ngi lah map kumba T.850 Klur” ong u Bah Dhar.
Ula kyntu ia ki trai kali ba kidei ban siew pyndep noh ia ka jingsiew khajna hashwa ban kut noh ka jingtreikam jong ka OTS ha ka 31 tarik u Nailar.
Ula kyntait ruh ia ka jingkynnoh ba ka sorkar kala iashah tang iaki kontraktor.
“Ngi trei na ka bynta jong baroh. Ka jingkiew shaphrang jong kiba duk kadei ka jingkiew shaphrang jong ka jylla” ong u Bah Dhar bad ka bynrap ba kane kala lam ban iaid shakhmat ia ka ioh ka kot.
U Bah Dhar ula kdew ruh ia ki projek kiba kongsan, kiba kynthup ia ka jingtyrwa kaba T.21,000 Klur ka Greenfield Four-Lane na Umroi sha Ratacherra kaban pynduna ia ka por jong ka leit ka wan sha Khliehriat-Guwahati na ka 7 kynta sha ka 2 kynta shiteng.
Ula ong, ba ki kor tong um ki paidbah ha sor kila kiew na ka 7,000 ha u snem 2018 sha ka 4-5 lak mynta, la bhah tyngka na ka bynta ka college ia ka rilum Jaintia bad la pyllait T.600-700 Klur ban ai jingiarap ne ram ia ki seng trei mon sngewbha.
Haba pan jingkyrshan na ka bynta u Dr Nonglait, u Bah Dhar ula ong, ba kam long kaba suk ban lap bad kren ruh halor ka jingai jingshakri ka jongu kum u dkhot jongka PCI.
Ula iaroh ruh ia ka MLA ka thain ka Kong Santa Mary Shylla kaba la ioh ia ka T. 400 na ka bynta ki kam pynroi hapoh ka constituency.
“Ka Saipung kadei kawei na ki jaka kaba sahdien bha. Shisien ba lah dep ban shna pyndep ia ka Sutnga Road, phin sa iohi ia ka roi ka par kaba shisha” la bynrap u Bah Dhar.
