Shillong, Naitung 26: Ka skul North Liberty Higher Secondary School, Litter Star Higher Secondary School bad ka OM Roy Memorial Higher Seconadary School, kila ioh rah ia ka nam kum ki Champion jong ka State-Level Subroto Mukherjee Cup Football Tournament 2026, kaba la poi noh sha kaba kut ha ka sngi Saitjain ha madan SSA, Polo.
Kane ka lympung ialehkai ba san sngi, bala pyniaid da ka Tnad Sports & Youth Affairs, kala wanrah lang ia ki kynhun ialehkai jong ki skul kiba tbit tam na kylleng ka Jylla Meghalaya.
Ka North Liberty Higher Secondary School na West Jaintia Hills kala ioh rah ia ka nam lahduh jong ka U-15 Boys hadien ka jingiakhuh dohiap ban jop da 2-1 kol pyrshah ia ka Umpohliew Jingtip Higher Secondary School ka East Khasi Hills.
U Kyrshanlang Chyrmang bad Malcolm Nongbsap kila ioh thep nyngkong ban buh ia ka North Liberty hakhmat bad watla u Meshanskhem Kharbudon ula ioh ban pynphai ia kawei ka kol na ka bynta ka Umpohliew Jingtip, ka North Liberty ka khlem ailad satia haduh ba kut.
Ha ka final U-17 ki kynthei, ka Litter Star Higher Secondary School na Eastern West Khasi Hills kila ioh rah ia ka nam lahduh da ka jingjop ia ka North Liberty lyngba ka jingshut penalty. Hadien ka jing kut ba khleh kol ha ka 90 minit, ka Litter Star kala lah ban thep haduh 4 tylli ki penalty ban ioh rah ia ka trophy.
Ka lahduh jong ka U-17 ki shynrang kala leit sha ka OM Roy Memorial Higher Secondary School na East Khasi Hills, kaba la lah ban pynliem da 3-0 kol pyrshah ia ka Wapung Higher Secondary School ka East Jaintia Hills. U Deiwamut Syiem ula ioh ban thep arkol bad u Chesterfield Umsong ula ioh ban thep ia ka kol kaba lai ban pynskhem ia ka jingjop.
U Fairland Nengnong, Joplin Thongni, bad Redimingson Phawa kila shah jied kum ki Best Goalkeeper ha ka U-15 Boys, U-17 Girls, bad U-17 Boys.
U Inibait Lamare ka North Liberty, Jessica Myrthong ka Little Star, bad Ebenezer Sun ka O.M. Roy kila shah jied kum ki Player of the Tournament.
Da kane ka jingjop, kine ki lai tylli ki champion kin mihkhmat ia ka Jylla sha ka Subroto Mukherjee Cup jong ka Ri baroh kawei.
