Shillong, Naitung 24: Ka jingap ban iohi biang ia ki kynhun ba radbah ka nongbah Shillong ba kin iakhun biang ban ioh ia ka burom ka la jan kut, ha kaba ka Langsning kaba dang bat iaka nam lahduh kan iakhun pyrshah ia ka Sawmer ha ka jingiakhun plie ia ka Shillong Premier League 2026 ha madan SSA, Polo haka 25 tarik Naitung, por 4:45 baje janmiet.
Ka Langsning kala wanphai biang shaka jingiakhun hadien baka wan ba ar haka 5th Meghalaya State League ha u bnai Jylliew.
Nalor baka don iaka thong ban ioh bat biang iaka nam lahduh haka SPL, ka Langsning ka dang pynkhreh ruh ban ïakhun ha ka lympung Durand Cup kaba dei ruh ka sien ba nyngkong ba kan shim bynta ha kane ka lympung.
Dangshen ka Langsning ka la pynbna ïa ka thup jong ki nongïalehkai ba thymmai na ka bynta ka samoi thymmai, ha kaba 10 ngut ki nongialehkai kidei kiba dang shah thied thymmai.
U Samuel L Kynshi, uba la ju ïalehkai na ka bynta ka India ha ka Asian Games, u mihkhmat bad ka kynhun kaba kynthup u rangïalehkai barim ka Shillong Lajong FC, Mawlai SC, Punjab FC bad Real Kashmir FC kiba dang shu wan ïasoh bad ka Langsning.
U Samuel udei uba shu wan ialehkai naka Gokulam Kerala ha ka Indian Football League.
Kiba wan rung na ka FC Bengaluru United shaka Langsning ki kynthup u Allen Lyngdoh Nongbri bad u Syed Ahmed kiba la lehkai teng haka I-League 2, kaba la pynlong ïa ka FCBU ban kiew kyrdan sha ka IFL 2026-27.
Ki 2 ngut ki nongialehkai ki la iasoh na ka Garhwal FC ki kynthup u Richie Kharbani bad u Rohan Manar.
U Midfielder u Alex Manar uba la ialehkai na ka bynta ka Meghalaya ha ka U-20 Men’s National Football Championship ruh u la wan ban pynïasoh lang.
4 ngut kiwei pat kiba dang shu soi ki long u Monush Lapang (uba wan rung na Rymbai Shkenshynriah), u Mebanshngain Kurkalang (Rangdajied United), u Wadajied Kynsai Ryngkhlem (Shillong Lajong) bad u rangïalehkai shadien u Rituraj Boruah (Chhaygaon).
Ka Sawmer haka samoi bala dep ka wan haka kyrdan ba 6 hadien ba ka jop saw sien bad shah rem san sien.
Ka Langsning ka la jop lut ïa ki lai tylli ki jingïakhun pyrshah ïa ka Sawmer haka SPL hynrei kane ka Sawmer ruh kala thied bun ngut ki nongialehkai.
Ki nongialehkai thymmai ka Sawmer ki kynthup u Oresterwell Langshiang, uba dei uwei na ki katto katne ngut ki rangïalehkai ba la soi na Nongrim Hills, u Raikutshisha Buam bad u Banteilang Lyngdoh na Nangkiew Irat bad u Cannyson Kharnaior na Malki.
Namar iaki jingiakhun ha ka SPL mynta kan long tang First Leg, baroh ki jingialehkai ki long kiba kongsan bha.
Ka SPL kadei ka rynsan ban kyntiew ïa ka phutbol ym tang ha nongbah Shillong hynrei ha baroh kawei ka jylla Meghalaya bad ka resol ba mih naka SPL kaba don jingktah ïa kino ki kynhun ban rung sha ka SSA Super Cup, SSA Champions Cup bad ka MSL.
