Shillong, Naitung 25: U Kyrtong ka NPP u ban iakhun ia ka Elekshon Shiteng Samoi jong ka Shillong Lok Sabha u Dr DRL Nonglait hynnin ka sngi Thohdieng ula ong, ba u buh hakhmat eh ban ialeh ban wanrah ia ki kam pynroi ha ki shnong kiba don ha thain khappud, ban wanrah ia ki jingkylla ha ka pule puthi bad ban thaw ia ki lad aikam aijam lada u shah jied ban leit mihkhmat sha ka Parliament.
Haba kren ha ka rynsan ialap elekshon ha Patharkhmah, u Dr. Nonglait ula ong ba ki jaidbynriew ha ka thain khappud jongka Meghalaya-Assam kidei kiba la shah iehbein lah slem bah bad kidei hok ban ioh ia ki jingmyntoi kumba ioh kiwei pat ha ka bynta jongka jylla.
“Ki shnong ha khappud ki donkam ia ka bording elektrik, ki surok kiba biang bad ki skul kiba biang. Ki briew ki jong ngi kiba don hangtei kidei ban ioh ia kijuh ki jingmyntoi kumba ioh ki briew ha Patharkhmah, Maïrang bad kiwei kiwei ki thain jong ka Ri Khasi” ula ong ha ka jingialang.
Ula kynnoh ia ki sorkar kiba rim kiba la pynbor ia ki nongshong shnong ha khappud ban shaniah ha ka Assam bad kane kala lam sha ka jingduh ei ia ki jaka ki puta.
Ula ong ruh ba kane ka thain ka mad ia ki jingeh kaba donkam kyrkieh ban shimkhia mardor, ha kaba ha kane ka jingialang la iadonlang u Symbud myntri Rangabh ka jylla u Bah Sniawbhalang Dhar, u MLA ka Jirang u Bah Sosthenes Sohtun bad u MLA ka Mawhati u Bah Charles Marngar.
“Ngi hap ban wanrah ia ki kam pynroi bad ia ka jingkiew shaphrang khnang ba ki paitbah ha ki thain khappud kin sngew ba kidei kiba don hapoh ka jylla Meghalaya bad kidei ki Khasi bad Pnar ki bym shim la shah iehbein” ula bynrap.
“Shisien ba nga lah shah jied, ngan wan hi dalade ban jngoh ia kine ki thain ha ki bnai kiban sa wan. Ki kam pynroi ha khappud kan dei ka mat kaba ngan buh hakhmat eh” ula ong.
U Dr Nonglait ula pynpaw ruh ia ka jingsngewkhia ia ka jinglong jingman jong ki Secondary bad Higher Secondary School ha Jirang bad ha kylleng jong ka Ri Khasi, ia kaba kila ap lah palat 20 snem tam ban ioh ia ka jingkyrshan na ka sorkar wat hapdeng ba kila ioh ia ka jingithuh.
Ula ong, ba ula dep ban aiti ia ka jingtyrwa sha u Myntri Rangbah ka Jylla u Conrad K. Sangma bad sha ki Symbud Myntri Rangbah ka Jylla u Bah Prestone Tynsong bad u Bah Sniawbhalang Dhar ban ai ia ka Salary Grants na ka bynta ki nonghikai ha ki Secondary School, kaban iasyriem kum ka Scheme na ka bynta ki skul LP bad UP.
“Ka pule puthi kam pat long kaba ryntih. Ngi donkam ia ka polisi kaba shai kdar bad ngi donkam ia ka jingiatreilang ban pynbeit noh ia ka” ula ong.
U Kyrtong ka NPP ula ong, ba ka Meghalaya kadei ban seng ia ki Food Processing Unit khnang ba ki nongrep kin lah ban pynkylla ia ki soh ki jongki sha ki mar kiba lah ban pyniaid ha ki iew ki hat ban ia kaba shaniah ha kaban shim na kiwei pat.
Ula pynpaw ruh ia ka jingduna ha ka jingdon jong ki karkhana shna juti bad ula pdiang ia ka jingthmu ka Sorkar Jylla ban tei ia ka Market Complex ha Patharkhmah bad Jirang ban kyntiew ia ka khaii pateng ha kane ka thaiñ.
Ha kaba iadei bad ka kam jngohkai ula kdew ia ka Amkyrbai Lake kaba don hajan Jirang ba kadei ka jaka kaba kot bor ban khring bha ia ki briew bad ula kyntu ia ka sorkar ba kadei ban leh ia ki kam pynroi da kaba tei ia ki jingtei ha kane ka jaka.
Ula kdew ruh ba kane ka thain kadei kaba bun bha ki kali kiba na Assam kiba wan ban iaid lyngba ka Ri Bhoi ban leit sha kiwei pat ki district, kumta dei ban leh eiei ha kane ka thain ban khring ia ki.
“Ngi don ia ki jaka kiba itynnad hynrei ym shim la shna pynbha eiei ia ki. Ka Amkyrbai Lake ka lah ban kylla long kum kawei na ki jaka jngohkai kaba kongsan lada ngi kynshew ia ka pisa ha ka” ula ong.
U Dr Nonglait ula ong, ba da ka jingdon u MP u ban iaid ryngkat lang bad ka Sorkar Jylla kan pynsuk shibun ban tynruh ia ki projek jong ka Sorkar Pdeng bad ki skhim kiba kot da ki klur tyngka.
“U MP na ka liang synshar yn ym donkam ban leit mareh na kawei ka jingkhang sha kawei pat. Ki paitbah ki lah ban wanrah beit beit ia ki jingeh ki jongki bad ngi lah ban pynbeit ia kitei lyngba ka jingiakren. Ka kam kan long kaba iaid beit iaid ryntih” ula ong.
Ula kyntu ia ki nongthep vote ba kin kyrshan ia u kum u kyrtong uba lah ban iatreilang bad ka sorkar ban pynioh ia ka jingdawa ban pyntreikam noh ia ka ILP bad ban pynrung noh ia ka ktien Khasi ha ka khyrnit kaba phra jong ka riti synshar ka ri.
“Ngam shim la iakhun tang na ka bynta kawei ka seng. Nga iakhun na ka bynta baroh ki nongthep vote jong ka Shillong Constituency” ula ong bad ka kyntu ia ki paitbah ba kin ia mih bun bad ban ia mih ryntih ban leit thep vote.
