Shillong, Naitung 22 : Ka Raid Buam, kala ai burom ia u Symbud Myntri Rangbah ka Jylla Bah Sniawbhalang Dhar da kaba jer kyrteng ia ka kshaid kum ka “Kshaid Sniawbhalang Dhar”.
Ia kane ka jingai kyrteng la pyndep rukom ha ka jingialang kaba long ha Amtharonh Pdeng Thangchap, kaba hap hapoh ka Amlarem Sub Division ha ka sngi U Blei.
Kum shibynta jong kane ka jingialang, u Bah Sniawbha ula buh ia u maw nongrim jong ka project pynroi kam jngohkai hapoh kane ka jaka.
Kat kum ka jingong ki nongpyniaid, kane ka jaka ka dei kaba la ai sngewbha da ka Raid Buam, ka Raid kala khmih bad pyniaid ia ki jingdon jingem ka mariang hapoh ka thain.
Ka Raid Buam ka ong ba kane ka jingai nam ka long kum ka jingithuh ia ka bynta jong u Bah Sniawbha ha kaban pynbeit ia ki jingeh ba iadei bad ka jingpyniaid ia ka jaka jngohkai ha Krangshuri bad ka synniang jong u sha ka roi ka par hapoh ka thain.
Ka Raid kala pynkup burom ruh ia u Symbud Myntri Rangbah ha kane ka prokram.
