Guwahati, Naitung 22: Ka jingshlei um ha Assam ka la kylla long ka jingeh ba khraw ha ka sngi Ba-ar ha kaba 21 ngut ki briew ki la duh noh ïa la ka jong ka jingim tang hapoh 24 kynta, kaba la pynlong ïa ka kum kawei na ki sngi ba shyrkhei tam jong ka jingshlei um kaba mynta, wat haba ki wah ki dang bteng ban pynshlei ïa ki jaka jong ka Upper Assam. Baroh kiba iap ki long 31 ngut.
Katkum ka Assam State Disaster Management Authority halor ka jingshlei um, baroh 21 ngut kiba iap ki dei na ka daw ka jingshlei um, ha kaba ha Sivasagar ki don 13 ngut kiba iap, bud sa ka Charaideo (5), Golaghat (2) bad Jorhat (1).Ki lanot ki kynthup ïa 12 ngut ki shynrang, phra ngut ki kynthei bad saw ngut ki khynnah, kaba pynpaw ïa ka jingduh jong ki briew ha kane ka jingjia ba sngewsih.
Kane ka jingshlei um ka la ktah mynta ïa 5,64,660 ngut ki briew ha kylleng ki 872 tylli ki shnong ha ki 16 tylli ki district, katba palat 24,210 hectare ki jaka rep ki dang shah tap um. Ka Sivasagar, ka la paw kum ka District, kaba la shah ktah jur bha, ha kaba la jan 3.6 lak ngut ki briew, ki la shah ktah bad bud sa ka Jorhat bad ka Charaideo.
Ka wah Brahmaputra ka la shlei palat ia ka dak jingma ha Neamatighat, katba ka wah Burhidihing bad ka wah Dhansiri ruh ki dang sah halor ki kyrdan jingma. Ka wah Dikhou bad Disang ki la shlei palat ia ka jingshlei um kaba heh tam, kaba la pynmih ia ka jingtieng kaba kham jur.
Ki kam ai jingiarap ki la nang jur shuh shuh ha kylleng ki distrik ba shah ktah.Ki bor pyniaid ki la plie 273 tylli ki (relief camps and distribution centres) ne ki jaka ai jingïarap bad ki jaka sam jingïarap, kiba la pynsah ïa palat 12,200 ngut ki briew kiba la shah pynkynriah, katba sa shi lak ngut ki briew ki dang ïoh jingïarap shabar ki jaka sah. Ki tnat pynlait im, kynthup ïa ka SDRF, NDRF bad ki Fire & Emergency Services, ki la pynkynriah ïa palat 6,100 ngut ki briew da kaba pyndonkam ïa ki lieng.
Ka jingshlei um ka la ktah jur ruh ia ka rep ka riang bad ka ri jingri jingdup. Haduh 1.85 lak tylli ki mrad ki la shah ktah, katba katto katne ki surok ki la shah pynjulor, kaba la pynthut ia ka jingpyniasoh ha ki bun tylli ki distrik.
