Gangtok, Naitung 21: Ka jingiap ha ka jingbthei ka tunnel ha ka NHPC Teesta Stage VI Hydroelectric Project kaba dang shna ha Namchi district, South Sikkim, ka la kiew sha ka 10ngut, ong u Myntri Rangbah ka Jylla, u Prem Singh Tamang, ha ka sngi Ba-ar, wat haba ki kynhun ai jingiarap, ki dang iai bteng ban wad ia ki nongtrei kiba la ngeit ba ki la sah kut shapoh.
Haba kren sha ki lad pathai khubor, u Tamang u la ong ba 25 ngut ki nongtrei ki la sahkut hapoh katei ka tunnel hadien ka jingbthei ha ka sngi Nyngkong ha ka por janmiet.Arngut ki nongtrei ki la lah ban phet krad, katba ki kynhun ai jingiarap haduh mynta ki la ioh ban sei ia ki 10 tylli ki met iap.
“Kumba phi tip, hynnin ka sngi ka la don ka jingbthei hapoh ka tunnel kaba dang shna.Kumba 27 ngut ki nongtrei ki don hapoh ha katei ka por.Arngut ki la lah ban phet krad, hynrei 25 ngut ki dang sahkut.Haduh mynta, ki kynhun pynlait im ki la lap ia 10 tylli ki met iap,” la ong u Myntri Rangbah ka Jylla.
Conducted a joint inspection with Hon’ble Governor Shri Om Prakash Mathur Ji at the under-construction tunnel of the NHPC Teesta Stage VI Hydroelectric Project at Samardung, Jholungey, in Namchi District.
We inspected the tunnel where the tragic incident of July 20 claimed the… pic.twitter.com/zjdsxVINQM
— Prem Singh Tamang (Golay) (@PSTamangGolay) July 21, 2026
U la ong ba ka jingialeh ban pyllait im, kaba don bynta lang bad ki National Disaster Response Force (NDRF), State Disaster Response Force (SDRF), ki kynhun pynlait im bad kiwei kiwei ki tnad, ka dang iaid shakhmat wat hapdeng ki jingeh.
U Tamang u la ong ba ki jingtip ba nyngkong ki pyni ba katei ka jingbthei ka dei na ka daw jong ka methane gas ym na ka jingtwa khyndew ne u slap uba jur.
“Ngi la iohsngew ba ka jingbthei ka la jia namar ka methane gas.Kam shym la jia namar ka jingtwa khyndew ne u slap,” u la ong bad bynrap ba ka sorkar jylla kan thung ia ka jingtohkit kaba ha khlieh duh ne ka (high-level inquiry) ban lap ia ka daw jong ka jingjia aksiden bad ban pynbeit ia ka jingkitkhlieh.
U myntri rangbah ka jylla u la pynbna ia ka jingiarap kaba ₹4 lak na ka bynta kiba ha iing jong kiba iap bad ₹50,000 na ka bynta kiba mynsaw.U la ïathuh ruh ba u Myntri Rangbahduh ka ri u Narendra Modi bad u Myntri kam pohïing jong ka sorkar pdeng u Amit Shah ki la ïakren bad u bad pynthikna ïa baroh ki jingïarap kiba lah na ka bynta ka jingpyllait im.
U Prem Kumar, Deputy Commandant ka 2nd Battalion jong ka NDRF, u iathuh ba saw tylli ki kynhun shipai NDRF, ki la don ha katei ka jaka, ha ka janmiet jong ka sngi Nyngkong bad ki la sdang ia ki kam pynlait im, naduh katei ka por.
“Haduh mynta, la sei 10 tylli ki met iap. Ki kynhun jong ngi ki bud ryntih ia baroh ki kyndon katba ki dang pynlong ia ka jingwad bniah,” u la ong.
Ha kajuh ka por, u Abhijeet Kundu, u Superintendent of Rescue, Eastern Coalfields u la iathuh ba ka kynhun jong u ka la iohi sa hynniew haduh 8 tylli ki met hapoh katei ka tunnel hynrei kim shym la lap satia ia kiba lait im ha ka jingwad nyngkong.
“Ki kynhun jong ngi ki kit ïa ki oxygen cylinders namar ba ka tunnel ka jrong kumba 1.5 km bad ki jinglong jingman hapoh ki long kiba eh haduh katta katta.Ngi dang don ka jingkyrmen ba lada don kiba dang im, ngin lah ban pynlait im ïa ki,” u la ong.
Ka jingialeh ban pyllait im ka dang ïaid shakhmat da ki tiar ba kyrpang katba ki kynhun ki dang trei lyngba ki jinglong jingman kiba shyrkhei hapoh khyndew ban sei ïa kito kiba dang don hapoh ka tunnel.
