Shillong, Naitung 21: U Myntri ka tnad PHE Marcuise N Marak u la iathuh ba ka Sorkar kan rah ia ka khubor ban pynneh bad tyngkai ia ka um bam um dih sha man ki shnong lyngba ka ‘Jal Utsav’ kaba dei ka jingialap paidbah halor ka skhim Jal Jeevan Mission 2.0.
Ïa kane ka prokram la plie paidbah haka jingialang kaba la pynlong ha State Convention Centre ha ka 20 tarik Naitung.
Ia ka ‘Jal Utsav’ yn ialap paidbah da kaba buh ryntih ia 3 tylli ki phang pdeng kata, ban rakhe, ban sngewthuh bad ban iada.
Haba kren sha ki lad pathai khubor, u Marcuise u la ong ba kane ka jingialap kaba 6 bnai ka thmu ban pyniasoh ia ki SHG bad ki Rangbah Shnong ha ka jingpyrshang ban iada ia ki tyllong um.
“Ka dei shaphang ka jingrakhe ia ka um, ka jingpynskhem ia ki tyllong um, lyngba 3 tylli ki phangdpeng kata ban rakhe, sngewthuh bad ban iada. Ngi kwah ban wanrah ia ka jingsngewthuh sha baroh ki nong shong shnong” u la ong.
Halor ka jingsdang tyrkhong ki tyllong um bad ki wah, u Myntri u la ong ba ka jingeh ka dei ha ka pyrthei baroh kawei.
“Ka jingsdang tyrkhong ki tyllong um ka dei ka jingeh kaba ju iakynduh ha baroh kawei ka ri bad ha ka pyrthei baroh kawei. Ka Sorkar ka la dep sdang ban shim katto katne ki sienjam ban iada bad pynim biang ia ki tyllong um. Katto katne ki projek ki dang iaid ka jingpyntrei haduh mynta” u la ong.
