Shillong, Naitung 20 : Ka Meghalaya High Court kala bthah ia ka Sorkar Jylla ba kan aiti ia ka affidavit ba batai shai ia ka lynti ban pynheh ia ka surok liengsuin ha Shillong Airport, wat haba ka DGCA kala ong ba ka kloi ban ai ia ka jingbit ban pyntrei noh ia ka kam shisien ba ki jingai jingmynjur jong ka Sorkar kila biang lut.
Ka Division Bench ka Chief Justice Revati Mohite Dere bad Justice W Diengdoh kala pynmih ia kane ka jingbthah haba bishar ia ka PIL ha ka sngi Nyngkong.
U Joint Director ka DGCA, B Bhushan uba mihkhmat lyngba ka video conference, ula pyntip ia ka Iingkashari b aka DGCA kan pyniaid shakhmat ia ka kam da ka jingai jingbit ban pyntrei tang mar syn iohia ka jingkular kaba pura na ka Jylla ban weng lut ia baroh ki jingeh ha ka surok ban her bad hiar ka liengsuin jong ka Kad.
Kine ki bynta ki long kiba kongsan na ka bynta ka jingshngain ki liengsuin bad ki dei ki jingeh ba hakhmat eh ha ka jingpynheh ia ka kad.
U Advocate General A Kumar, ba mihkhmat ia ka Jylla, ula pan por ban file ia ka affidavit ba batai kumno yn pyntrei ia ka jingpynheh ia ka surok liengsuin hapoh ka kad.
Ka Iingkashari kala ailad ia ka jingkyrmen bad bthah ia ka Jylla ban file ia ka affidavit hapoh ka Registry hashuwa ka sien shong bishar ban wan bad ban phah copy ruh sha baroh ki liang mamla.
Ka Iingkashari kala bthah ruh ia u AG ban ai jubab ia ki mat kiba la pynpaw ha ka paragraph 3 jong ka affidavit bala file da u Amicus Curiar P Yobin.
Kala bthah ruh ia ki Ophisar na ka DGCA bad ka Sorkar Jylla ba kin iadonlang, la ka long da ka met lane lyngba ka Video Conference, ha ka sien shong bishar ban wan.
Ia kane ka mukutduma la buh ban bishar biang ha ka 23 tarik Naitung 2026.
