Imphal, Naitung 18: Katto katne tylli ki seng Naga ha Manipur ha ka sngi saitjain ki la aiti da ka dorkhas sha u Myntri kam Pohiing Amit Shah, ba dawa ban thung ia ka jingtohkit kaba khlem shah liang halor ki jingjia thombor, kam pyniap ba dang shen haba kynnoh ba ka don ka jingleh shiliang ha ka rukom pyniaid jong ka jylla ia ka jingiakynad hapdeng ki jaitbynriew.
Ki seng ki la pynpaw ka jingsngewkhia halor ka jingbteng jong ki kam thombor ha ka jylla watla la thaw ïa ka sorkar thymmai ba la ïalam da u Myntri Rangbah ka jylla u Yumnam Khemchand, da kaba ong ba ki jingpynïap bad ki jingshah pynkynriah jaka ki la ïai bteng bad ba ka jingsuk kam pat wan.
Ha ka dorkhas, ki seng ki la buh jingkylli ia ka jinglong pdeng jong ka sorkar jylla, da kaba kynnoh ba ki nongialam ba mynta kim shym la lah ban pynmih ia ka jingshaniah ha baroh ki jaitbynriew bad ki la kwah ia ka jingsynshar kaba kham khlem liang.
Ki la pyrshah ruh ïa ka jingthung ïa ka Nemcha Kipgen kum ka Deputy Chief Minister, da kaba kynnoh ba ka don ka jingïadei hapdeng ka longïing jong ka bad kawei ka kynhun kaikhlaw Kuki, bad ki la kyntu ïa ka sorkar kmie ba kan shim khia ïa kaei kaba ki la batai kum ka mat kaba sngewkhia bha ki paidbah.
Ki seng ki la dawa ia ka jingtohkit kaba laitluid (Independent Judicial Inquiry) halor ka jingiap jong kawei ka kmie bad ki khun ha ka jingbthei bom, ka jingshah pyniap jong ki ar ngut ki trai shnong ha TM Kasom ha Ukhrul district, bad ka jingshah rahbor bad shah pyniap jong ki 6 ngut ki trai shnong na Konsakhul.
Ki la khot ruh ban bishar bniah ia ka jingiateh Suspension of Operations (SoO) bad ki kynhun kieng atiar jong ki Kuki, da kaba kynnoh ba ki la pynkhein bunsien ia ki kyndon ba kongsan bad wad ban pyntreikam kham tyngeh ia ka jingiateh.
Ka dorkhas ka la ong ba ka jingtohkit kaba khlemshah liang halor ki jingjia bad ka jingbishar bniah ïa ka jingpynbeit jong ka SoO ka long kaba donkam bha ban pynphai biang ïa ka jingshaniah jong ki paidbah bad ban kyntiew ïa ka jingsuk kaba neh ha ka jylla kaba la shah ktah na ki jingshah thombor.
