Nongpoh, Naitung 16 : Ka Synjuk ki Rangbah Shnong ka Ri-Bhoi Mihngi, kala dawa ia ka Meghalaya Energy Corporation Limited (MeECL) ba kan siew bai lutksan sha ki longiing jong ki lai ngut ki khynnah kiba iap shah bat bording elektrik ha shnong Umtangling.
Ka Synjuk hapoh ka jingialam u Chairman Bah PB Sylliang, kala leit iakynduh ia u Deputy Commissioner ka Ri-Bhoi Dr Abhilesh Saini bad aiti da ka jingthoh ba dawa pynkloi ban siew ia ka bai lutksan sha ki longiing kine ki lanot.
Haba kren sha ki lad pathai khubor, u Bah Sylliang u pyntip ba mar syn ioh jingtip ia katei ka jingjia, ka Synjuk kala leit mar mar sha katei ka shnong ban iadon ryngkat bad ka iing ka sem bad ban pynpaw ia ka jingsngewlem halor kane ka jingjia kaba sngewsih.
Ula pynshai ba ka jingdawa siew bai lutksan kam dei satia iapein ia ka jingpang mynsiem jong kitei ki longiing hynrei ba kan long ka jingiarap kaba donkam ha kum kane ka por ba mad ia ka jingeh.
Ha kajuh ka por, ka Synjuk kala pynpaw ruh ia ka jingsngewkhia halor ka jingbym shimkhia ka MeECL ia ki jingujor jong ki bor pyniaid shnong ka Umtangling, uba la pyntip ia ka jingma kaba ap ia ka thain na ki sainar bording.
Namar kata, ka Synjuk kala kyntu ia u Deputy Commissioner ba un bthah ia ki Ophisar ka MeECL ba ki dei ban shimkhia bad leh eiei mardor haba don kino kino ki jingjia ba iadei bad ka jingshngain jong ki nongshongshnong khnang ba kum kine ki jingjia kin ym jia shuh hadien habud.
 ba kan siew bai lutksan sha ki longiing jong ki lai ngut ki khynnah kiba iap shah bat bording elektrik ha shnong Umtangling.){kind=link}