Shillong, Naitung 13 : Ki Pulit kila khot hajir ia ki trai bad u contractor hadien ka jingiap ki 5 ngut ki nongbylla hapoh ka pung um ha ka shnong Lapalang, kaba la ngeit ba dei ba ki ioh ring mynsiem da ka tdem generator katba ki dang pump ia ka um na kane ka pung.
U Superintendent of Police ka East Khasi Hills bah Vivek Syiem ula iathuh ba ki Pulit kila register iaka case ka jingbym shimkhia pyrshah ia ki.
“Ka dei ka jingjia kaba sngewsih ha kaba haduh san ngut ki briew kila iap hapoh ka pung um. Kila iap namar ka bih carbon dioxide. Ngi la register ia ka case hapoh ka kyndon 106 namar ka jingbym shimkhia kaba lam sha ka jingiap, bad kyndon 50 bad 51 jong ka Disaster Management Act” ong u Bah Vivek.
U Bah Vivek ula iathuh “Ngi la khot hajir ia u trai K Hinge bad Contractor M Beena ban pynlong ia ka jingtohkit” bad la khot hajir ia ki hapoh ka kyndon 33 jong ka BNSS.
Ki Pulit ki dang ap ia ki kaiphod technical hashuwa ban rai ia kaei kaba dei ban leh. Ki Pulit kim pat kem satia iano iano ruh halor kane ka jingjia.
