Guwahati, Naitung 13: Kawei ka ïingmane ka la shah rong noh bad katto katne ki jingkieng ki la shah pynjulor ha ka jingshlei um ha kylleng ki bynta jong ka Arunachal Pradesh ha ka step sngi Nyngkong, kaba la iehnoh ïa ka jingjulor ha ka District khappud kaba hap ha Kurung Kumey.
Ki jaka kiba la shah ktah jur ki kynthup ia ka Kurung Kumey, Kamle bad Pakke Kessang district, ha kaba u slap uba jur ha ka shi miet u la pynlong ia ka wah Kumey ban shlei um, kaba la pynshlei ia ki shnong ki thaw bad pynjulor ia ki jingtei.
Ha Parsi Parlo, ka St. Thomas Church kaba don ha katei ka thain ruh ka la shah rong noh, katba ka Inspection Bungalow kaba don ha Parsi Parlo ka la shah pynjot ha ka um. Ar tylli ki iing sah ki la shah pynjulor, bad ki jingkieng kiba pyniasoh ia ka Huri sha ka shnong Damin bad ka shnong Pagam ki la shah rong noh ha ka um, kaba la pynthut jur ia ka jingpyniasoh surok.
“U slap uba jur ha ki bynta ba shalor jong ka wah Kumey ha ka por mynstep ka la pynlong ïa ka jingshlei um, kaba la wanrah ïa ka jingjulor kaba khraw ha Parsi Parlo Circle bad Damin Sub-Division,” ong uwei u heh ophisar.
Ka bor pyniaid district ha ka jingïakynduh bad ki pulit, ki shipai bad kiwei kiwei ki nongïashim bynta ban bishar bniah ïa ki jingjulor bad ban pynïaid beit ïa ki kam ai jingïarap.
Ki heh ophisar ki la iathuh ba kane ka dei ka jingjia kaba lai ha Arunachal Pradesh ha kine ki shi bnai ba ladep.Ka jingshlei um kaba dang shen ka la pynthut ruh ia ka lynti ban leit sha kawei ka ktem jong ka ITBP hadien ba kawei ka jingkieng ka la pra.
Ym shym la don kano kano ka jingjia ba sngewsih haduh mynta, wat haba ki bor pyniaid district ki dang bteng ban buddien ia ka jinglong jingman hapdeng ka jinghap slap kaba jur kaba bteng.
