Nongstoin, Naitung 10: Ka lympung jingïalehkai Subroto Mukherjee Cup 2026 jong ka West Khasi Hills District ka la kut noh mynta ka sngi da ki jingialehkai final ha ki kyrdan bapher bapher ha madan New Nongstoiñ.
Ïa ka jingïalang pynhap pyrda la wan ban pynshongkun da ka Deputy Commissioner ka West Khasi Hills District, ka Hema Nayak, kum ka kongsan bad la synranlang ïa ka da u A.J. Sangma Deputy Superintendent of Police West Khasi Hills, ka Kong B. Syiem District Sports Officer, lem bad kiwei pat ki riew rangbah.
Ha ka jingïakhun phainal jong ka Under-15 Boys, ka Kyrshai Government LP & UP School ka la rah ïa ka nam lahduh da ka jinglah ban pynliem ïa ka Anderson Higher Secondary School lyngba ka tie-breaker.
Ha ka jingïakhun phainal jong ka Under-17 Girls pat ka Lurmangkara Secondary School, Risiang ka la pynliem ïa ka Nonglang Secondary School, Nonglang bad rah ïa ka nam lahduh.
Ha ka jingïakhun phainal jong ka Under-17 Boys, ka Dapboklang Giri Memorial Secondary School, Porla ka la lah ban pynliem ïa ka Sibsingh Memorial Government Higher Secondary School da 3 kol la 1.
Ha ka kyrdan Under-15 Boys, u Apbanshai Syiem Shangoi na Anderson Higher Secondary School ula shah jied kum Best Player, katba ïa u Ribankupar Parïong na Dapboklang Giri Memorial Secondary School la ai ïa ka khusnam Best Goalkeeper.
Ha ka kyrdan Under-17 Girls, ka Lahunshisha Kharbani na Nonglang Higher Secondary School kala shah jied kum ka Best Player, katba ïa ka Lily Ch. Marak na St. Xavier Higher Secondary School la ai ïa ka khusnam Best Goalkeeper.
Ha ka kyrdan Under-17 Boys, u Iohborlang Lyngkhoi na Dapboklang Giri Memorial Secondary School ula shah jied kum Best Player, katba ïa u Vishalfield Nongbri na Bethel Press Higher Secondary School la ai ïa ka khusnam Best Goalkeeper.
Ka kongsan ka la sam ruh ïa ki khusnam sha ki nongjop bad ka la kyntu ïa ki kynhun kiba la jop ba kin ïai trei shitom bad pynkhreh bha na ka bynta ka State Level Competition.
Ka la ong ruh ba ka District Sports Office ka dang bteng ban wad bad kyntiew ïa ki sap jingïalehkai jong ki samla pule bad kyntu ïa ki ba kin pyndonkam hok ïa ki lad jingïarap kiba ka tnad ialehkai ka ai.
