Shillong, Naitung 10 : U Myntri ka Tnad Animal Husbandry Bah Sanbor Shullai ha ka sngi Thohdieng, ula pyntip ba ula bthah ia ki shipai BSF ba kin pynkhlain ia ka jingtalasi ha ki jaka khappud, ban thaw ia ki Special Task Force ha man ki District bad ban jur ia ka jingdonkam ban pynkloi ia ka jingker sainar khnang ban tehlakam ia ka kam khaii tuh ia ki masi sha Bangladesh.
U Bah Sanbor ula pyntip ia kane hadien ka jingialang bad u Inspector General (IG) ki BSF ha ryngkat ki heh Ophisar na ka Tnad Animal Husbandry.
“Dang ha kine ki khyndiat sngi, kila mih ki khubor ha Social Media ba kynnoh ia ka jingshyrkhei ki kamm khaii tuh ia ki masi. Nga la thoh mardor sha u IG ki BSF. Mynta ka sngi ngi la iashong syndon da ka jingialang bad ngi la iakren bun kiei kiei” iathuh u Bah Sanbor.
U Myntri u iathuh ba kawei na ki kam ba kongsan bala iakren ka long ban pynkhlain ia ka jingpeitthuh bad jingtalasi ha ki jaka kiba jur ka jingkhaii tuh.
“Ngi la kyntu ia ki bor shipai BSF ba kin pynkhlain ia ka jingtalasi ha ryngkat ka jingiatreilang bad ka Tnad Pulit bad ki Border Magistrate” ula ong.
“Ngi la iakren ban buh noh da ki check point ha ki jaka kiba jur ka jingkhaii tuh ia ki masi, ka ban long hapdeng ki BSF, ki Pulit bad ka Tnad Veterinary” bynrap u Bah Sanbor.
U Myntri ula pyntip ruh ba ula dep ai ka jingbthah ban thaw noh mardor ia ki District-Level Tast Force ki ban bat ia ki masi ba khaii be-ain.
“Nga la kyntu ia ki Ophisar ba kin thaw mardor ia ki Special Task Force kaba long kat kum ki Rule ha baroh ki District ba kin bat ia ka jingkit ia ki masi bala kurup. Ia kine ki masi ba ioh kurup dei ban wanrah sha ka Animal Shelter jong ka Tnad” ula ong.
Haba batai bniah, ula ong “Kat kum ka SOP bad ka jingpynbna bala pynmih da ka Tnad Animal Husbandry & Veterinary, dei ban thaw ia ka Special Task Force ha baroh ki District ban kit ia baroh ki masi bala ioh kurup sha ki Animal Shelter. Ki dkhot ka Task Force kin kynthup ia ki BDO jong ki C&RD Block kum ki Chairman, ha ryngkat ki O/C jong ki Police Station bad ki Veterinary Officer kum ki Dkhot. Kiwei pat ki dkhot kin kynthup ia ki District AH & Veterinary Officer bad ki Sub-Divisional AH & Veterinary Officer”.
Halor ki jingtei ha khappud, u Bah Sanbor ula iathuh ba ka Sorkar kan pynsted noh ia ki kam ker sainar ka ban pynshong nongrim halor ki jingtip ban sa ai da ki BSF.
“Da kaba pynshong nongrim ia ki jingai jingmut jong ka Tnad bad ki BSF, ngin sa pynsted noh ia ka jingker sainar. Kat kum ki record, ha ri-lum Khasi bad Jaintia, ki dang sah sa 27 km ki bym pat pyndep ia ka jingker sainar katba ha ri-lum Garo ki dang sah sa kumba 7 km tam” ula iathuh.
“Kumta, ki bor shipai BSF kila kyrpad ia ngi ban gin ai ia ki jingtip kiba bniah halor ki jaka kiba dang ieh ban ker sainar” iathuh u Bah Sanbor haba bynrap ba la aipor 13 sngi ia ki shipai BSF ba kin aiti ia ki jingai jingmut ha kaban pyndep noh ia ka jingker sainar ha kine ki jaka ba dang sah.
U iathuh ba kan sa don biang ka jingialang bad ki BSF hadien 13 sngi.
