Shillong, Naitung 07 : Ka Meghalaya Society for Social Audit and Transparency kan pynsdang ia ka jingleh social audit ba shisien shisnem jong u snem mang tyngka 2026-27 naduh ka 8 tarik Naitung, da ka jingthmu ban wanrah ia ka jingtreikam kaba shai bad ba don jingkitkhlieh ha ka jingpyntreikam ia ki skhim ha kylleng ka Jylla.
U Director ka MSSAT J Pyngrope ula ong ba kane ka jingleh audit ka dei kaba la pynwandur ban pyn thikna ba ki prokram ba Sorkar ki poi hok sha ki paidbah ba la thmu bad ba ia ki pisa paidbah la pyndonkam thikna.
“Ka Social Audit ka shim ia ka bynta kaba kongsan ban pynthikna ba ki skhim ka Sorkar ka poi sha ki nongioh bynta kiba thmu bad ba ka pisa bala mang jong kine ki prokram la pyndonkam bha” ula pynpaw.
Kane ka kam kan sdang da ka jingialang bad ki Tnad bad ka jingpruid dak ia ka audit calendar. Ki kynhun kin sa iaid sha man ki shnong ban pynthikna na man ki thliew iing, ka jingjurip ia ki jaka bad ka jingkhmih bniah ha ki jaka treikam.
Ia kane yn pynbud da ka jingiakren jong ki kynhun bad ki Social Audit Gram Sabhaas ba kin lum ia ki jingtip beit beit na ki shnong ki thaw.
Ia ki jingshem yn sa rah hakhmat ki Ophis ha ki Block Social Audit Public Hearing, ha kaba ia ki jing sngewkhia yn sa pynbeit mar mar ha katei hi ka jaka.
Ia ka Action Taken Report bala pynkhreh hadien kine ki hearing yn sa aiti sha ka MSSAT, u ban sa pynkhreh bad phah ia ka Annual Social Audit Report sha ka Sorkar Jylla.
Ha ka wat ba nyngkong jong u snem mang tyngka, ka audit kan khmih ia ka jingpyntreikam jong ki 12 tylli ki skhim ba kongsan ba kynthup ia ka MGNREGA, NSAP, Sarva Shiksha, PDS, PM Poshan, PMKSY, RDSS, the Special Livestock Production Programme, Blue Revolution, Jal Jeevan Mission, MOVCD-NER bad Rainfed Area Development.
U bynrap ba ki audit ym tang baki iarap ban lapdien ia ka jingiaid jong ki skhim hynrei ki synniang ruh sha ka jingjop ha ka jingpynyreikam da kaba pynthikna ia ki jingmyntoi sha ki paidbah.
Ka MSSAT ka khot ia ki nongioh bynta, ki riew paidbah bad ki nongpyntreikam ia ki skhim ba kin ia shimbynta shitrhem ha ka ban pynlong ia kane ka kam kaba don jingmut.
