Dawa ka JSU ban khang ia ki Bank ha Jowai namar ka lehniam Behdeinkhlam

Shillong, Naitung 07: Ka Jaiñtia Students’ Union (JSU) Jowai Circle ka la kyntu ïa ka Meghalaya Rural Bank ban bud ryntih ïa ki sngi shuti ba kyrpang jong ka Jylla ba la pynbna ha ka 8 bad 9 tarik Naitung ha kaba ïadei bad ka lehniam Behdienkhlam 2026.

Ka JSU ha ka shithi ba la thoh sha u General Manager (In-charge), Meghalaya Rural Bank, Jowai & West Jaintia bad ki jaka ba marjan, ka JSU ka la ong “Ban bthah mardor sha baroh ki Branch Manager khamtam eh ïa ki Branch Jowai bad Mihmyntdu, ba kin burom ïa ka sngi shuti ha ka 8 tarik Naitung 2026 namar ka lehniam Behdienkhlam 2026.”

Ha katei ka shithi ka JSU kala ong ba ka lehniam Behdienkhlam ka dei ka lehniam bad ka tamasa kolshor kaba kongsan tam jong ka jaidbynriew Pnar.

“Ka jingburom iaki sngi shuti kan pyni ia ka jingburom ia ki riti dustur bad ka jingsngew ba kyrpang jong ki paidbah ka West Jaintia Hills”, la ong ka JSU.

Ka JSU ka la kyrpad ruh ba dei ban pynmih kloi ïa ki jingbthah kiba donkam khnang ba baroh ki tnat treikam jong ka Bank kin kohnguh bad burom ïa ka jingpynbna shuti ha ka thaiñ.”