Don jingthmu ban pynkha ia ka Regional Office ka MSPCB
Shillong, Naitung 07 : Ka Sorkar Meghalaya kala thung ia ka Joint Committee ban tehlakam noh ia ka jingjaboh jong ka lyer ha Byrnihat hadien ka jingnang jur ka jingud jingnam ki paidbah halor ka jingnang sniew ka lyer bad ka jingktah ia ka koit ka khiah ki nongshongshnong ka thain.
Ia kane ka rai la shim ha ka jingialang bala pynlong da u Myntri Sorkar uba dei ruh u MLA ka Jirang Bah Sosthenes Sohtun ha ka sngi Nyngkong.
Ha kane ka jingialang la wan iashimbynta ki Ophisar ka Meghalaya State Pollution Control Board (MSPCB), ki nongmihkhmat na ka Byrnihat Industries Association (BIA), ka Meghalaya Industrial Development Corporation (MIDC) bad ki nongialam shnong ka thain.
Ha kane ka jingialang, ki nongmihkhmat na ki shnong ka thain kila pynpaw ia ka jingsngewkhia kaba jur halor ka jingnang jaboh jong ka lyer ring mynsiem ha Byrnihat, kaba la nang pynkha ia ka jingeh ha ka koit ka khiah. Kila ong ruh ba kine kiei kiei baroh kila jia namar ka jingbym shimkhia bha da ki bor ba dei khmih.
Ban pynkhlain ia ka jingpeitngor, ka Sorkar kala thaw ia ka Joint Committee ba kynthup ia ki Heh ka MSPCB, ki Nongmihkhmat na ki Shnong.
Kane ka Committee kan pdiang ia ki jingujor jong ki paidbah, kan peitthuh ia ka jingjaboh ka lyer bad ailad ia ki nong shongshnong ba kin aiti ia ki dur bad ki durkhih (video) kum ki sakhi, ki ban pynsuk ia ka jingpynshitom pyrshah ia ki karkhana kiba pynkhein ain.
Ha kawei pat ka jingtyrwa ba kongsan, ka MSPCB kala ai jingmut ban buh ia ka Regional Office ha Byrnihat ban pynkhlain ia ka jingpeitthuh ia ka jingjaboh ka lyer bad ban pynsted ia ka jingtreikam ban tehlakam.
U Myntri Bah Sosthenes ula kular ia ka jingialang ba un sa rah iakren ia kane ka jingtyrwa bad u Myntri Rangbah ka Jylla Conrad K Sangma.
Ha kajuh ka por, ka Byrnihat Industries Associaton kala ieng skhem ba ki karkhana kiba don ha Meghalaya kila pyntreikam pyrrkhing ia ki kyndon ban tehlakam ia ka jingpynmih tdem bad kam ba kaba bun na jingpynjaboh ia ka lyer ka dei ka tdem kaba mih na ki karkhana kiba don sha shiliang khappud ka Assam.
Ia kane ka jingialang la pynlong hadien ka jingsngewkhia kaba jur ia ka jingjaboh jong ka lyer ha Byrnihat, kaba la iai paw hapoh ka Ri kum ka jaka kaba jaboh tam ha ka jingkhein ia ka jingjaboh ka lyer ha ki khyndiat por bala leit.
