Shillong, Naitung 06 : Ka lympung ialehkai 14th Senior National Pencak Silat Championship 2026-27, kaba lai sngi, ka la sdang ha ka sngi Nyngkong ha SAI Multi Purpose Indoor Stadium, bad haduh 1500 ngut ki nongialehkai kynthei bad shynrang kin iakhun ban ioh ia ka nam kum ki lahduh.
Ia kane ka lympung ialehkai la plie da u Working President ka Meghalaya State Olympic Association bah John F Kharshiing.
Ki Nongialam jong kane ka jingialehkai kila buh ia ka kyntu ba dei ban pynrung ia kane ka jingialehkai kum kawei na ki jingiakhun naka bynta ka National Games ban long ha kane ka jylla ha u snem ban wan.
Ha kane ka lympung ialehkai, kumba 1500 ngut ki nongialehkai kynthei bad shynrang na kylleng sawdong jong ka ri kaba kynthup lang ia ka kynhun ialehkai jong ki tnat Pulit, ka Services bad kiwei kiwei, kila poi iashimbynta.
Haba kren kum u kongsan, u bah John u la ong ba ka jingpynkhreh naka bynta ban shim rai ia ki jait jingialehkai kiba la thmu ban pynlong ha ka National Games ka dang don hapdeng ka jingiakren ia pynbeit bad u Myntri ka sorkar kmie ba dei khmih ia ka tnat ialehkai u Mansuk Mandaviya, ka President ka Indian Olympic Association P.T Usha nangta u Myntri Rangbah ka jylla u Conrad K Sangma bad u Myntri ka sorkar jylla ba dei khmih ia ka tnat sports u bah Wailadmiki Shylla bad ki nongmih khmat ka MSOA.
U Bah John u kyrmen ba kin dang don shuh shuh ki jingiakren ia phylliew jingmut ia ki thup jong ki jingialehkai ban pynlong ha ka National Games, namar kumba ia tip ba ka la don ka jingkylla ha ka sports act ha kaba ki synjuk ialehkai kin hap ban pdiang bad treikam kat kum kane ka kyndon.
U bah John u kyrmen ba ha kine ki shibnai ne ar bnai kiban sa wan, kan sa don ka jingpynbna ia ki jait jingialehkai ban pynlong ha ka National Games bad u kam ba kum ka synjuk, ka MSOA ka long kaba la pynkhreh bad kumjuh na ka liang ki nongialam jong ka jingialehkai ka Pencak Silat ka ri, ki long ba la pynkhreh bad lah pynrung ia kane ka jingialehkai ha ka Natonal Games.
Ula pynpaw ba kane ka jingwan ban pynlong ia ka lympung ka long kum ka test event bad hangne yn sa lah ban tip janai ia kiei pat ki jingdonkam lada pynrung ia kane kawei ka jingialehkai ha ka National Games ban long ha kane ka jylla ha u snem ban wan.
Na ka liang ka Phiilia Thomas kaba dei ka Senior vice president ka Indian Pencak Silat Federation, ka pynkynmaw ba 12 snem mynshwa ha kaba la shu don kai thohmut thoh mat ki coach, ki nojgialehkai bad bym don wat tang ka jaka ialehkai kaba kyrpang, hynei haba phai mynta la don kumba 36 tylli ki jylla bad Union Territories kiba pynlong ia ka district, state bad ka national championship, ha kaba ki rang bad ki thei ialehkai ki la lah ruh ban mihkhmat ia ka India ha ki lympung ialehkai ha ka dewbah Asia ne ha ki world championship.
Kaei kane ka jingialehkai pencat silak, ka kadei ka jingialehkai kaba sdang napoh ka ri Indonesia kaba mynta ka India ka la lah ba kan pynlong kum kawei na ki jingialehkai jong ka.
Ha shwa ban pynkut ia ka jingialang plie ka la don ka jingpyni ia ka rukom ialehkai jong ka pencak Silat kaba la pyni da ki samla kynthei bad shynrang.
