Imphal, Naitung 06: Arngut ki shipai Assam Rifles ki la iap hashen ha ka jinghiar thma jong ki kynhun kaikhlaw ha Nungshang Kong, kaba hap hapoh ka Ukhrul district ka Jylla Manipur.
Ki shipai kiba la khlad ki dei kiba la tip kyrteng kum u Warrant Officer Balwant Singh bad u Havildar C.M. Singh.
La iathuh ba katei ka jingjia ka la jia ha ka por kumba 1:30 baje nohphai sngi katba kitei ki shipai ki dang leit phai sha 40 Assam Rifles’ Shangshak Battalion Headquarter.
“Kala don ka jingia ther kuli mar kylliang bad kala don ruh ka jingbthei bom kaba la bteng haduh ar kynta ha katei ka jaka,” ong ka tyllong khubor.
U Lat ka jylla Manipur u pynpaw ka jingsngewkhia kaba jur halor ka jingkhlad noh kitei ki 2 ngut ki shipai Assam Rifles.
U Lat u pynrem jur ia kane ka jinghiar thma kaba shyrkhei. Kum kine ki jinghiar thma kim don jaka ha ka imlang sahlang jong ngi bad kim lah ban pyntlot ia ka jingkut jingmut lang jong ngi ban pynneh ia ka jingsuk bad ka jingshngain.
U Lat u phah ka khubor jingsngewlem sha ki longïing kiba la duh noh bad u duwai ruh ba kin ioh ïa ka bor bad ka jingshlur ha kane ka kynta jong ka jingsngewsih.
U duwai ruh na ka bynta ka jingkoit jingkhiah kloi jong baroh kiba la mynsaw ha katei ka jingjia.
U Myntri Rangbah ka Jylla Manipur u Yumnam Khemchand Singh, ula pynrem jur ia katei ka jingshah thombor ki shipai Assam Rifles.
Ha ka kyrwoh ba la pyllait da ka Chief Minister’s Secretariat, u phah ka jingsngewlem sha kiba ha iing ha sem jong ki shipai kiba la khlad noh bad u la pynpaw biang ia ka jingkular jong ka Sorkar ban shim ia ka sienjam kaba tyngeh pyrshah iaki ba pynthut iaka suk ka sain.
