Shillong, Naitung 15 : Ka Synjuk ki Rangbah Kur ka Bri U Hynniewtrep (SRKBUH) kala pynsngew ia ka jingma kaba ap na ka ain KHAD (Regulation and Administration of Land( ( Amendment) Bill, 2026 bala wanrah da ka Executive Committee ka Voice of the People Party (VPP), kaba lah ban pyntlot ia ka bor jong ki Dorbar Raij bad Dorbar Hima, ki bor treikam nala tynrai kiba khmih bad pyniaid ia ki kam jaka bad kam shnong kam thaw ha ri-lum Khasi.
Ia kane ka jingsngewkhia la pynsngew ha ka jingialang jong ka SRKBUH ba long ha Mawkyrwat ha ka sngi Saitjain. Kane ka jingialang kala iakren sani halor ka Amendment bala wanrah da ka KHADC nalor ka jingdonkam ban iada ia ka jingai pateng ka Jaidbynriew Khasi sha ki Kynthei.
KI dkhot kila pynpaw ba katto katne ki kyndon ha ka draft bill ki kwah ban pynduna ia ka bor synshar tynrai jong ki Dorbar Shnong, Dorbar Raij bad Dorbar Hima. Kine ki bor treikam, da ki pateng la pateng, kila khmih bad pyniaid ia ka jinglong trai ia ka khyndew ka shyiap, ka jingpyniaid bad pynbeit ia ki jingiakajia kaba long kat kum ka ain riti dustur u Khasi.
Ka jingialang kala pynpaw ba ki Dorbar ki dei kiba la ithuh hapoh ka Sixth Schedule jong ka Riti Synshar ka Ri bad ki dei u buddien jong ka synshar khadar ha ki It ki Hima bad ki shnong ki thaw ha ri-lum Khasi. Kano kano ka jingpyrshang ban pyntlot ia ka bor jong ki, maham ki nongialam, kan ktah beit beit ia ka jingpyniaid ia ka khyndew ka shyiap kat kum ka riti dustur bad ka jingsynshar hi daladeda ka Jaidbynriew.
Katba ka Forum kam shym la pyrshah ia ki thong kiba kham iar haba buh da u pud ban don jaka bad buh record digital na ka bynta ka jingshai ba kham bha, kala ban jur ba kine ki jingpynkylla kat kum ka juk mynta kim dei pat ban iuhroit ia ka bor jong ki Raij bad Hima.
Ha kane ka jingialang la ai jingkren da u nongiasaid ain Robert June Kharjahrim, u CEM barim ka KHADC Bah Manstudy Nongrem, u President ka SRKBUH Bah RL Kharpram bad Secretary ka Synjuk ki Nongsynshar Shnong Bah RL Blah nalor ki Khlieh Nongsynshar bad kiwei kiwei.
Kane ka jingialang kala iarai lang ban kyrshan ia ka sinjem bala shim da ka SRKBUH bad ka Synjuk ki Nongsynshar Shnong ban iada ia ka hok halor ka khyndew ka shyiap kat kum ka riti dustur bad ka bor ki Dorbar Raij bad Hima bala pynkup bor da ka Riti Synshar ka Ri.
Kala rai ruh ban pyrshah ia kano kano ka jingthaw ain lane ki jingpyniaid kam kiban pyntroin ia ka rukom treikam ki Dorbar lane pyntlot ia ki jingiada ka Sixth Schedule.
Ban pynskhem shuh shuh ia kane ka nongrim, kala khot ia ka jingialang jong ki Rangbah Kur bad ki Khlieh jong ki Dorbar ha ka 7 tarik Naitung ha Shillong.
