Pynlait ka Sorkar Pdeng haduh T.1100 klur sha Meghalaya hapoh ka New Rural Job Act

Yn buria ka Jylla ia ka jingpynlut ba tam

Shillong, Jylliew 30 : Ka Meghalaya kala ioh ia ka bhah ba T.11,00 klur na ka Sorkar Pdeng na ka bynta ki khyndai bnai ba nyngkong ha ka jingpyntreikam ia ka Viksit Bharat-Guarantee for Rozgar and Ajeevika Mission (Gramin) Act, 2025 ba thymmai, ong u Myntri Rangbah ka Jylla Conrad K Sangma ha ka sngi Ba-ar hadien ka jingpdiang ka Kynhun Myntri ban pyntreikam ia ka Act.

Kane ka Act ba thymmai kan bujli ia ka MGNREG Act bad kan treikam naduh ka 1 tarik Naitung bad kan iaid haduh ka 31 tarik Lber 2027 na ka bynta kane ka bynta ba mynta. U Conrad ula ong ba kane ka song T.1100 klur ka dei ka jingai pisa da ka Sorkar India na ka bynta ka Meghalaya na ka bynta kine ki khyndai bnai.

U Conrad ula pyntip ba ia ka quarter ba nyngkong ne ki lai bnai ba nyngkong kata naduh u Iaiong haduh Jylliew la pyntreikam ia ka skhim hapoh ki kyndon jong ka MGNREGS kaba rim.

“Ka jingpynreikam ia kane ka ain ba thymmai kan sdang lashai ka sngi. Kumta naduh ka 1 tarik Nairung haduh ka 31 tarik Lber, 2027 yn sa pyntreikam ia kane da ka Meghalaya…..hynrei naduh lashai ka sngi ki kyndon ba thymmai bad ka Act ba thymmai kan sa treikam”.

U Conrad ula ban jur ba katba ka song T.1100 klur kan dei kaba iasam ha ka ratio ba 90:10 hapdeng ka Sorkar Pdeng bad ka Jylla, kano kano ka jingpynlut ba palat ia kaba la mang yn hap ban buria da ka Meghalaya.

Ka VB-G Ram G Act ka nang kyntiew ia ka sngi treikam bala pynthikna na ka MGNREG Act kaba long na ka 100 sngi sha ka 125 sngi bad pyniar ia ki kam kiba lah ban pyntrei na ka 240-250 sha palat 320.

“Kumba phi top kane ka dei ka Act ba thymmai ha ka jaka jong ka MGNREG Act bad ia kane la nang pynkhlain mynta bad ki kyndon kum ki sngi bylla ba 100 sngi la kyntiew sha ka 125 sngi” ong u Conrad.

Ki project kum ki surok bad ki lad pyniasoh, ki bym shym la buh hakhmat mynshuwa, mynta la buh kum ki kam kiba hakhmat. Ki Anganwadi Centre bad ki Iingskul, ki bym shym la shah hapoh ka MGNREGS, la lah ban pyntrei mynta.