Burom ka Sorkar ia ka rai ka MCA halor ka case leh kynshlei ia ki thei ialehkai U-23 : Wailad

Shillong, Jylliew 29: U Myntri ka tnat Sports and Youth Affairs Bah Wailadmiki Shylla u la ong ba ka Sorkar Jylla ka burom ia ka rai ba la shim da ka Meghalaya Cricket Association (MCA) haba iadei bad ka jingkynnoh shah leh kynshlein kawei ka samla ialehkai Cricket U-23 ka Jylla haba bynrap ba kane ka sienjam bala shim ka long hadien ka jingtohkit kaba bniah.

“Ïa kane ka mat la rah nyngkong da ka MCA bad hadien la shim pat daka Women’s Commission” ong u Bah Wailadmiki.

U Bah Wailadmiki ula kdew baka MCA ka dei ka kynhun treikam kaba laitluid.

“Ka BCCI bad ka MCA ki treikam kum ki kynhun laitluid (autonomous bodies). Kiba bun ka jingmang pisa jong ki ka wan na ka BCCI” u la ong.

“Kumta kum ka Sorkar ngi burom ia ki rai jong ki. Ngi la iohi ruh ba kila leh iaka kamram ba dei ban leh bad la pynlong ia ka jingtohkit. Ka kaiphod kaba ki la ai ruh ka dei kaba la pynshong nongrim na kata ka jingtohkit” u la ong.

“Na ka jingïohi jong nga, ki la leh ïa la ka jong ka bynta. Ka rai ba la shim ka long katkum ka jingshem jong ki” u la bynrap.