Kyrpad ia ka MSWC ban bishar thymmai ia ka hukum
Shillong, Jylliew 29 : U President barim ka Meghalaya Cricket Association Naba Bhattacharjee ha ka sngi Nyngkong, ula kyntait ia ki jingkynthoh u James Sangma halor ka jingshah pynngat jong u hapoh ka Meghalaya State Women Commission (MSWC) ha ka case leh khlemakor ia ki thei ialehkai U-23, haba pynpaw ba kane ka jingujor kam pat ju wan hakhmat jong u ha ka por ba u long President.
Haba shim ia ki jingkynthoh u James Sangma kum kaba shu “mutdur bad ba shah liang”, u Nab aula ong ba ula leit mih hakhmat ka MSWC ha ka 26 tarik Jymmang, 2026 bad ula ai ka jingiatreilang kaba pura bad ka jingbishar.
“Haba jubab ia ki jingkynthoh u James, kaba mih ha ki katto katne ki lad pathai khubor ba nga shah pynngat ha ka MSWC halor ka case leh khlemakor ia ki thei ialehkai cricket U-23 ka Jylla, Nga kwah ban pynrem jur ia ka jingkynthoh kaba long kaba shu mutdur bad ba shah liang” ula ong.
U Naba u pyntip ba la iathuh ia u ha ka jingbishar ka MSWC ba ka jingujor ki thei ialehkai cricket U-23 ka dei kaba la aiti ha ka 3 tarik Nohprah 2025. Hynrei, ula ban jur ba um don satia ki nongkitkam ka MCA kiba pyntip sha u halor kane ka ujor hashuwa jong ka Apex Council ba thymmai kaba la jied ha ka 19 tarik Nohprah 2025 lane hashuwa ba ka Apex Body kaba rim kan pynlait ia ka Ophis ha ka 13 tarik Kyllalyngkot, 2026.
“Ia ka ujor ki thei ialehkai cricket U-23 ym shym la wanrah sha ka jingtip jong nga da kino kino ki nong kitkam ka MCA hapdeng ka 3 tarik Nohprah 2025….bad ka elekshon ki Nongkitkam ba thymmai kaba kut ha ka 19 tarik Nohprah 2025….nalor kata, ia kane ka kam ym shym la don ba pyntip ia nga” ula ong.
“Lada ia kane ka kam la wanrah sha ka jingtip jong nga wat ha ki kynta ba khatduh jong ka por treikam jong nga, ngan jin da khot ia ka jingialang ba kyrkieh jong ka Apex Council ban pynbeit ia kane ka kam ba kongsan bad ban leh eiei kat kum ki ain bad ki lynti treikam” ula bynrap.
Haba jubab ia ki jingkylli halor ki lad ai khubor, u Naba ula ong “Kum u President, ngam ju da khmih ia ka email ka MCA kaba ju peit da ki nongtrei ka Ophis bad kiwei ki Nongkitkam kiba leit Ophis manla ka sngi”.
Ula pynpaw ba u don ia ka jingngeit kaba pura bad ka jingbishar kabym shah liang jong ka MSWC bad kyrpad ia ka Commission ba kan shong bishar biang ia ki jingai jingbatai jong u bad ki kot ki sla ban kyrshan halor kane ka kam.
 ha ka case leh khlemakor ia ki thei ialehkai U-23, haba pynpaw ba kane ka jingujor kam pat ju wan hakhmat jong u ha ka por ba u long President.){kind=link}