Nagaland | Sdang ka jingiakhih ‘Fed-Up Nagas’ | Aipor 3 bnai ia ka Sorkar Pdeng ban pyntreikam ia ki soskular jingsuk

Dimapur, Jylliew 27: Haba la sngewngiah bad thait namar ka jingpynslem ïa ka jingïasuk jong ki Naga, da ki spah ngut ki samla Naga ha ka sngi Saitjaiñ ki la sdang ïa ka jingïakhih “Fed-Up Nagas” ha Dimapur—ka jingthmu bym dei ka kam saiñ hima sima, ka bym dei jong ka jaitbynriew—bad ki la kyntu ïa ka sorkar pdeng ba kan pyntreikam ïa ki jingïateh kular bala dep pynbeit haduh mynta, ka ban hapoh ki lai bnai ban wan.

Da ki spah ngut ki samla ki la ïaid paidbah da kaba jai jai naduh ka Clock Tower sha madan jong ka Agri Expo shwa ban aiti ïa ka dorkhas sha u Myntri Rangbah duh ka ri u Narendra Modi, da kaba kyntu ïa ka Sorkar India ban burom ïa ki jingkular katkum ka Framework Agreement jong u snem 2015 bad ka NSCN (IM) bad ïa ka jingïateh kular jong u snem 2017 Agreed Position kaba la ia soi bad ka Working Committee jong ka NNPGs.

Katkum ka dorkhas, watla ka Sorkar India ka la pynbna ba ka jingïakren ïasuk ka la kut ha u bnai Risaw 2019, “ym shym la jia ei ei kaba bun ha kaba ïadei bad ka jingpynurlong ïa ka plan treikam kaba skhem halor ka jingpyntreikam.”

“Ka Nagaland mynta ka sngi ka dang jynjar hapoh ka jingma jong ka jingbym don aiñ, ki kam runar, ka jingbamsap, ka jingdawa pisa, ka jingbym don kam don jam, ka jingwan buhai shnong shabar ha ka liang ka ioh ka kot bad ka jingïapher jong ki jinglong jingman ha ka imlang sahlang,” la ong ka dorkhas.

Da kaba batai ia ka jingpynslem kaba slem kum ka “jingpynjot”, ka seng ka la ong ba ka la theh petrol ia ka jingkulmar, ka jingbamsap bad ka jingbym thikna.Ka la kyntu ia ka sorkar pdeng ban khot mardor ia ka jingialang kaba kynthup ia baroh ki kynhun iakren jong ki Naga bad ban iasoi ia ka jingiateh sain pyrthei kaba bniah ban pynsuk ia ka jingpynbeit kaba neh da ka jingkyrshan jong baroh ki Naga, khlem da khein ia ki kynhun.

Ka dorkhas ka la buh ruh ïa ka por ba lai bnai ban pyntreikam, da kaba maham ba lada ym lah ban leh eiei kan pynbor ïa ka jingïakhih ban sdang ïa ka non-cooperation campaign.

Haba kren ha ki lad pathai khubor, uwei u dkhot jong ka committee u la ong ba kane ka jingïakhih ka la mih na ka “jingbitar kaba la lum lang na baroh ki liang” halor ka jingbym don ka jingkiew kaba lah ban ïohi ha ka jingïasuk.

“Dei na ka bynta ka lawei jong ngi ba ngi pan ba ïa ki jingïateh kular dei ban pyntreikam.Hadien ba ngi la pynlut por da ki phew snem ban ap, ngim don lad shuh hynrei ban shim khia.Kane ka dei ka jingkhot bym don jingleh donbor (non-violent call), kaba la kyrshan da ka jingkut jingmut jong ki million ngut ki samla Naga,” u la ong, da kaba bynrap ba kane ka jingïakhih ka la nang wan dur lyngba ki jingïakren la palat shisnem.

Uwei pat u dkhot jong ka committee, uba la pynithuh ialade kum u Nino, u la ong ba katei ka jingkhih ka pyni ia ka jingkyrmen bad jingkhuslai jong kawei ka pateng baroh kawei.

“Ka pateng kala aiti ha ka duwan jong ka jingap.Ym ia u Gen Z, ym ia u Gen Alpha, bad thikna ba ym ki pateng kiba bud kin kylla long ki lanot ha kane ka jingap kaba slem bad kaba khlem jingmih.Ai ba kane ka jingap kan kut noh ha ka por jong ngi,” u la ong.

U la bynrap ba ki Gen Z ki la pynkhreh ban kit ïa ka jingkitkhlieh ban ïohi ïa ka jingïasuk haduh ka jingpynkut kaba don jingmut.

U dkhot ka Working Committee (NNPGs) bad u nongialam barim ka NSCN (IM) u Kitovi Zhimomi ruh u la kyrshan ia kane ka jingiakhih jong ki samla, da kaba ong ba ym don shuh ki mat kiba kongsan ban iakren namar ba ka jingiakren ka la dep kut.

“Ngi la pynkhreh ban ia soi ia ka jingiateh ba khatduh ha kano kano ka sngi.Kum ki kynhun kiba ia kren, ngim don shuh ia ka agenda kaba sah.Nga kyrpad ia u Myntri Rangbahduh ka ri u Narendra Modi bad ia u Myntri kam poh iing u Amit Shah ba kin shim ia ka jingkhot sain pyrthei kaba rai mynta,” la ong u Zhimomi.

U la kyntait ruh ïa ki jingai jingmut ba ki jingïapher hapdeng ki kynhun Naga ki pynsangeh ïa ka jingïaid lynti, da kaba pynskhem ba baroh ki kynhun ïakren bad ki kyrshan ïa ka jingpynbeit thymmai kaba kloi bad kaba donburom ha ka saiñ hima sima.