Bthah ia u DC ban peitthuh ioh kiew dor ka marbam bad ka leit ka wan
Shillong Jylliew 22: U Symbud Myntri Rangbah ka Jylla Bah Prestone Tynsong, ha ka sngi Nyngkong, ula bthah ia u Deputy Commissioner ka East Khasi Hills lem bad ka NHIDCL ba kin jurip ia shilynter ka surok naduh Laitlyngkot shaduh ki bynta ba sharum ka thain Pynursla, ban peitthuh ia ki jaka kiba idon jingma bad ban shimkhia mardor ban wanrah ia ka jingshngain ha ka leit ka wan.
Kane ka jingbthah kala mih na ka jingialang bishar kam bala lum da u DyCM bad ki Heh Ophisar ka District, ka tnad PWD, NHIDCL bad ka kompani ba pyntrei ia ka surok Shillong-Dawki ha Inspection Bungalow ha Laitlyngkot.
Ia kane ka jingialang la lum hadien ka jinghiar jurip ia ka bynta jong ka surok kaba la twa na ka jingther jong u slap ha ka sngi u Blei, kaba la pyndkut syndon thui ia ka jingpyniasoh ia ka surok na Shillong sha Dawki.
“Ngi la bthah ia ka NHIDCL bad ia ka kompani ba kin leit ban jurip bha ia ki jaka kiba don ki wahduid kiba lah ban heh um lada jur slap” iathuh u Bah Prestone.
Nalor kane, u Bah Prestone ula bthah ruh ia u DC ban peit bniah ba lehse ioh ka don ka jingkiew dor ki marbam mardih ne ha ka leit ka wan ha ka thain Pynursla.
“Nga lah bthah ia u DC ban peit bniah ioh ka mih ka jingkiew dor ki marbam mardih bad ka bai leit bai wan ki paitbah. Lada jia ba ka don shisha kumta ka sorkar kan tuklar kumno ban iarap ia u paidbah” la ong u Bah Prestone.
Haba kylli ia ka jingtwa ka surok, u DyCM ula iada da kaba ong ba yn ym lah ban shu kynnoh than tang ia ka kompani kaba pyntrei ia ka surok Shillong-Dawki halor ka jingjubor ka jingtwa jong ka surok harum ka shnong Laitlyngkot kaba la jia ha ka Sngi u Blei.
Ula ong, “Ngin ym lah than ban ong ne kynnoh ia ka Company, namar ka jingjur palat u slap ha ka miet sngi Saitjain bad ka jingtuid jong ka um ha ka wah ruh kala long kaba shyrkhei kat haduh ban kit ia ki mashin. Kane kam dei kaba jia tang hangne harum Laitlyngkot hynrei shatei sha ka bynta ba shna ia ka surok sha Dawki ruh ki mashin kila shah kit ha ka wah. Ngim poi pyrkhat ba un jur bha u slap”.
U Bah Prestone ula ong, ha ka jaka kaba la don ka jingtwa kaba don harum jong kawei ka jingkieng, la shim ia ka rai ba dei ban pynkhuid bha ia katei ka jaka khnang ba ka um kan ym lang ne kan ioh ban ksam sha ki surok.
Kane ka jingjulor kynsan jong ka surok Shillong-Dawki ha ka thain Laitlyngkot kala jia ha ka sngi u Blei, kaba la pynlong syndon ia ki bor pyniaid district ban khang shipor ia ki paidbah bad ia ki kali ban iaid na katei ka surok namar ba kan buh ha ka jingma.
