Shillong, Jylliew 22 : Ka Sorkar Jylla kan sa tei sa kawei ka Meghalaya House ba thymmai ha Vellore ban pynbiang jaka sah ia ki nongshongshnong ka Jylla kiba leit wad jingsumar ha CMC Vellore, ong u Myntri ka Tnad General Administrative Department Bah Sosthenes Sohtun ha ka sngi Nyngkong hadien ka jingleit jurip ia ka Jingtei ba don mynta.
U Myntri, ba la synran da u Commissioner & Secretary, OSD bad ki Nongtrei ka Meghalaya House Bellore, ula leit jurip ia ka jingtei ba don mynta bad pyniaid ia ka jingialang bishar kam ban shim jing khein ia ka jinglong jingman jong kane ka jingtei bad ban iapyrkhat ruh ia ki jingdonkam ba hadien habud.
“Ngi la pynlong ia ka jingjurip bad ka jingialang bishar kam ban shim ia ka rai halor ka jinglong jingman ka Meghalaya House ha Vellore” ong u Bah Sosthenes.
Haba batai ia ka jingtei ba mynta kum ka “jingtei kaba la rim bha” kaba don tang kumba 30 kamra, u Myntri ula ong ba kane ka jingtei kala ai ka jingshakri ia ki nongpang na Meghalaya kiba leit wad jingsumar sha CMC Vellore la bun bun snem.
Ula pynpaw ruh ia ka jingnang kiew ha ka jingdon ki nongpang kiba leit wan jingsumar sha Vellore. “Ka jingdon ki nongpang ba leit wad jingsumar kala kiew na u snem sha u snem. Tang ha u 2025, ngi la tam ia ka 212 ngut ki nongpang” ula ong bad bynrap ba ki nongpang bad ki nongsynran kila pynpaw ia ka jinghun bad ka jingai jaka sah bad ka jingshakri.
U Bah Sosthenes ula ai ruh ia ka jingiaroh ia ki jingkyrshan jong ka Sorkar Jylla. “Nga kwah ban ai khublei ia u Myntri Rangbah Conrad K Sangma bad ka Sorkar Meghalaya namar ka jingpynbiang ia ki kali khlem ka jingsiew na ka bynta ki nongpang. Ngi la buh ia ki kali ban kit ia ki nongpang sha hospital ban ioh jingsumar. Kane kala iarap bha ia ki ban lait ka pynlut ha ka leit ka wan” ula ong.
Haba kdew ia ka kaiphod ba dang shen jong ki Engineer ka PWD, u Myntri ula ong ba ka jinglong jingman jong ka jingtei kala tor bha. “Kat kum ka kaiphod ki Engineer ka PWD, ka rukom long jong ka jingtei hangne ha Meghalaya House, Vellore ka long kaba la rim bha bad ngi hap ban shim ia ka rai” ula pynpaw.
Kum ka sienjam ba mardor, ka Sorkar kan pynkynriah ia ki nongpang sha ki guest house ba shu wai naduh u bnai ban wan. “Ngin sa shim wai ia ka guest house ba thymmai ban ai jaka sah ia ki nongpang ba wan na Shillong bad naduh u bnai ban wan ngin sa pynkynriah noh ia ki shatei”ula ong.
Na ka bynta ka kam ba hadien habud, ka Sorkar ka thmuban tei ia ka Meghalaya House ba thymmai ka ban kham bun ki jaka sah. “Ngi la rai ruh ban tei ia ka Meghalaya House ba thymmai ha Vellore. Ngi la pan ia ka jingkyrshan bad ka jingmynjur na ka Tnad Planning bad Finance ban ioh tei thymmai ia ka jingtei” ong u Myntri.
“Ia mynta ki don tang 13 tylli ki kamra kiba treikam. Ka jingtei ba thymmai kan don arshah ne lai shah ki kamra khnang ba ngin lah ban ai jaka sah kham bun ia ki nongpang bad ki nongap ha Meghalaya House Vellore” ong u Bah Sosthenes.
