SHILLONG, JYLLIEW 20: Ka nongrwai Rap kaba pawnam ha ka ri bad ka nongthoh jingrwai ka Daiaphi Lamare, ia kaba la tip ia kum ka Reble, kala shah pynkup burom da ka khusnam ‘Icon of the Year’ ha ka jingialang kaba nyngkong eh jong ka Hello Meghalaya Music Awards kaba la long ha SRTG Ground, Polo. Haba ai jingkren pdiang ia katei ka khusnam, kala kyntu ia ki samla nongrwai ka Meghalaya ba kidei ban jam shaphrang bad ban sam ia ka sap ka phong ka jongki bad ka pyrthei, bad ka ong, ba ka jinglong ka tem ka put bad ka rwai ha ka jylla ka long kaba kham phylla ban ia kaba ki mut.
Ia ka Reble la pynkup burom da u Myntri Rangbah ka Jylla u Conrad K Sangma, uba la iaroh ia ka kum ka “icon” na ka bynta kiba bun ngut ki samla bad kaba la pynshongshit bad pawnam syndon ha ka ri baroh kawei”.
“Nga dap da ka jingkmen ba phi lah iaroh ia kaei kaba nga lah leh. Ka long shisha ka burom” ong ka Reble ia u Myntri Rangbah bad ia ki paitbah.
Haba jubab ia ka jingkylli u Myntri Rangbah ia ka kyrwoh na ka bynta ki samla ka jylla bad ia ki nongtem nongrwai, kala ong, ba ka Meghalaya mynta ka lah don ia ka rynsan bad kane kadei kaba ym shim la don satia ha ki por ba ka dang khynnah bha.
“Mynshwa ngim don ia kaba kum kane ka jingai khusnam ne Music Award. Kane kadei kaei kaei kaba ngam ju poi pyrkhat haba nga don ha Shillong. Ka kham long bunsien, ‘Nga donkam ban mih noh nangne khnang ba ngan lah ban leh eiei’. Hynrei mynta phi baroh phi lah ia don ia ka rynsan, phi don ia kaei kaei bad phi donkam ban pyndonkam ia kata”.
Da kaba jingiatreilang bad ki nongtem bad nongrwai ha kylleng ki bynta jong ka ri India bad nabar ka ri, ka Reble kala ong, ba ki briew kiba don ia ka sap ka phong ha ka jylla Meghalaya kidei ki bym shim la ioh satia ia ka jingithuh.
“Ka jingdon sap don phong ki briew hangne bun na phi phim don jingtip. Phi donkam ban leit shatei ban pyni bad shisien ba phi la leit shabar phin sa sngewthuh haduh katno phi long kiba tbit. Nga lah peit ia baroh ki jingpyni sap, ki Choir, ki khynnah rit bad baroh ki long kiba biang bha, phi donkam ban ngeit ia katei. Ngi donkam shuh shuh ia ki briew”.
Haba kala tip ba kala shah khot sha ka kam rwai, kala ong, ba kam shim la don ia kano kano ka jingartatien.
“Naduh ba nga lah sdang ha ka kam rwai, nga ju don beit ia ka rukom sngew ba ka lah dei shisha bad ngam ju don ia kano kano ka jingsngewpher. Naduh ba nga dang khynnah, nga lah sngewthuh shai ba kane kan sa urlong. Nga tharai ka long kaba kongsan ban don ia katei ka jingsngew man la ka sngi”.
Haba kylli kaei kaba ki briew kiba nabar ki ju kynmaw kyndiang shaphang ka kolshor ka tem ka put ha Shillong, ka Reble kala ong, ba kadei ka khana bad ka jingangnud kaba heh kaba wan na ka jaka.
“Haba phi wan na ka jaka kaba kum kane, phi donkam ban don ia ka jingangnud kaba heh bha bad ngi don ia ka khana ka kyrpang ban iathuh. Ngi dei ban iarap ia ki briew ba kin sngewthuh, ym ban peit ha kata ka rukom “oh kim sngewthuh ia ngi” hynrei ban peit ia kane ka jingiapher kaba lah ban lam ia ka sap ka phong”.
Kala ai khublei kyrpang ia ki nongkyrshan kiba nyngkong eh ki jongka, kala jer ia ka kyrteng u D’mon jongka Khasi Blood bad DJ Nag kum ki nongbtin bad nonghikai kiba kongsan.
“U D’mon ula iarap ia kiba bun ki nongrwai kiba dang khynnah bad u Nag ula leh DJ bad nga naduh ka por ba nga dang sdang, ngi lah leh lang ia ka NBA. Kala long shisha ka jingiaid lynti kaba long shimet ha ka jingim. Nga lah sdang na kane ka nongbah, nga kwah ruh ban ai khublei bad burom ia baroh”.
Kane ka jingai khusnam, kala paw ruh kum ka jingpyrshang ha ka sien kaba nyngkong jong ka jylla ban ai jingithuh kyrpang ha ka rynsan na ka bynta ki nongtem nongrwai ka jylla ha ki bynta ki bapher bapher ha ka rukom tem bad rwai.
