Shillong Jylliew 18: Ka Director General of Police Kong Idashisha Nongrang ha ka Sngi Palei, kala pyntip ba ka Tnad Pulit kala tynjuh pyrshah ia ka hukum ka iingkashari halor ka jingai jamin (bail) ia ka Sonam Raghuvanshi, ka nongshah kynnoh ba hakhmat eh halor ka jingpyniap iala u kurim bad nongkhaii na Indore u Raja Raghuvanshi.
“Halor ka Case jong ka Sonam, ngi lah mudui da ka mukotduma pyrshah ia ka iingkashari kaba la pynmih ia ka hukum kaba la ai jamin noh ia ka” ong ka DGP haba iakren bad ki nongthoh khubor.
Haba jubab ia ki jingkylli halor ka jingkynnoh ba kala don ka jingdkoh ka rukom treikam da ki ophisar kiba pynlong ia ka jingtohkit, ka Kong Nongrang kala ong, dei ban ai ka jinglaitluid ha ka rukom treikam jong u Investigating Officer ha ki jingjia kiba kham jwat kiba kynthup ia bun ngut kiba suba jur.
“Phi hap ban ai katto katne ka bynta jong ka jinglaitluid ia ki IO khamtam ha kane ka jingjia, kam dei tang ia iwei i briew, ki don bun ngut ki briew bad kane kadei kaba don tang ha kawei ka kot namar ba ka Transit Remand ka long ka kyndon kaba dei (correct section) kadei tang ha kawei ka kot hi ba ia katei ka kyndon la kum bakla thoh” kala ong.
Ka DGP kala pynshai ba ha ka Transit Remand Proceeding la kdew ia ka kyndon kaba dei, hynrei ka jingbakla kala long tang ha kawei pat ka kot ia kaba la kum bakla thoh ia katei ka kyndon.
Kala ong, ba katei ka jingduna kam shim la ktah pat ia katei ka Case baroh kawei.
