Shillong Jylliew 17: U Myntri ka tnad Arts and Culture Bah Sanbor Shullai ryngkat bad u Myntri ka koit ka khiah Bah Wailadmiki Shylla, ha ka sngi Balang, kila leit jurip ia ka jaka kaba don mar pyrshah ka Kiang Nangbah Government College, Jowai ban tei u motsahnam ba shi rynnieng jong u Khlawait ka ri u Woh Kiang Nangbah.
“Kane kadei ka sien ka ba-ar, ba ngi lah ia wan jurip ia kane ka jaka bad mynta ka kynti ngin ialeh ban pyndep noh ia ka jingtei ia une u motsahnam u Kiang Nangbah ha ka jaka jong ka Tnad Transport” ong u Bah Sanbor Shullai hadien ba jurip.
U Bah Sanbor ula ong, “Ha u snem 2022, kum u Myntri, ngi lah shimkhia bad wan jurip ia kane kajuh hi ka jaka ryngkat ka jingdonlang u MLA ka thaiñ, ki nongialam shnong bad ki nongialam sengbhalang ka rilum Jaintia bad ngi lah phah ia ka jingthoh sha ka tnad Transport bad la pynbna ruh ia kane ka jaka kum ka Kiang Nangbah Square.
Ha katei ka por ngi lah pan 10,000 sq ft ka jaka ban pynieng ia u mot sahnam ba shi rynnieng jong u Kiang Nangbah, hynrei kala wan noh ka elekshon bad ngam shim la long myntri sorkar shuh bad kane ka kam kala sahkut noh”.
“Kane kan dei ka jingwan jurip kaba khatduh bad ngi lah ia rai ba ngi ieng beit ha kajuh ka nongrim ban pan ia ka jaka kaba 10,000 sq ft na ka tnad Transport bad nangne yn sdang ban phah noh ia ki kot ki sla ban ioh pynieng ia u motdur ba shi rynnieng” ong u Bah Sanbor.
U Myntri ula pynpaw ba u MLA ka thaiñ Bah Waialdmiki Shylla, wat u Myntri Rangbah ka Jylla u Conrad Sangma bad u Symbud Myntri Rangbah Bah Sniawbhalang Dhar, kiba la pynpaw ba dei beit ban pyniaid shakhmat ia kane ka kam bad ban aiti ia ka kaiphod khnang ba yn ioh ban bhah noh ia ka pisa bad hapoh une u snem yn sa sdang noh ia ka jingtei ia une u motdur jong u Kiang Nangbah.
U Bah Sanbor ula ong, nalor ka jingtei ia u motsahnam, yn buh ruh ia ki jaka bam, jaka shongkai bad ka jingbuh rekod ia ka histori khnang ba kane ka jaka kan khring ia ki nongjngohkai kaban long ka jingmyntoi ia ka thaiñ.
Haba kylli kaei ka daw kaba pynlong ia u ban shna ia ki motdur jong ki nongiakhun laitluid ka jylla, u Bah Sanbor ula jubab da kaba ai nuksa, “Hapoh State Central Library Shillong u don u motdur ba shi rynnieng jong ka Indira Gandhi bad u Subhash Chandra Bose hynrei jong u Tirot Sing, Kiang Nangbah bad Pa Togan u don tang uwei u maw kyrteng ia ki bad wat u motdur jong u Babu Soso Tham ruh u don uba tang shiteng. Ha ka por jong nga, ngi lah pynieng ia u motdur ba shi rynnieng jongu Tirot Sing, Kiang Nangbah bad Pa Togan bad kane ka jingpynieng kadei ruh namar ka jingai jingmut jong kiba bun ki samla samhoi bad ngi iaid beit ha ka nongrim ban trei beit da ka kam bad ban pynduna ia ka jingkren (Work More, Talk Less).
Namar ka kam ka kham sawa jam ban ia ka ktien bad ngim don por ban leit hylla sha surok, ha iew, shu pynhylla ia ki paitbah bad ha kaba khatduh ka kam pat kam ler”.
Na ka liang u Bah Wailadmiki Shylla ula pynpaw ia ka jingsngewnguh ia u Bah Sanbor Shullai, ki nongialam shnong, ka Jaintia Students Union bad kiwei kiwei kiba pyni ia ka jingkwah ka jong ngi kaba lah slem bha ban ioh ia ka jaka ban pynsah kynmaw ia u nongiakhun ban pynioh ia ka jinglaitluid na rilum Jaintia u Woh Kiang Nangbah.
“Kane ka jingwan jurip ka long ban ai ka jingpynshai ia ka jingdonkam jaka khnang ba ka MTC kan ioh ban rah pat ia kane ha ka jingialang jong ka Baord” ula ong haba pyntip ba ki Engineer kin sa khmih bniah bad ban pynkhreh ia ka Detail Project Report (DPR) halor kane ka kam.
Katba u President ka JSU u Bah J Shylla ula ai khublei ia u Bah Sanbor Shullai bad ia u Bah Wailadmiki Shylla kiba la shimkhia ia kane ka kam bad ula pynkynmaw ba ka JSU kala dawa la slem bha ban tei ia u mot ba shi rynnieng jong u Kiang Nangbah.
gialam ka JSU.
