Shillong, Jylliew 17 : U Symbud Myntri Rangbah ba khmih ia ka kam Pohiing Bah Prestone Tynsong ula kyntu ia ki nong iakhih ba shong shah thngan ha East Jaintia Hills halor ka kam tih dewiong, ba kin pynkut noh kham kloi ia ka jingiakhih bad ban wan iakynduh ia ka Sorkar, haba pynpaw ba ka Sorkar kala bthah ia ki kynhun bapher bapher ba kin “ap lai bnai” katba ka dang buddien ban pynjynsur na ka Sorkar Pdeng.
“Ha ka jingshisha, ka Sorkar, lyngba u Myntri Rangbah ka Jylla, kala dep kular ia baroh ki kynhun ba don bynta ha ka kam, ‘Sngewbha ap lai bnai’. Ka Sorkar kan pyrshang ban buddien bad ka Sorkar India bad kan pyrshang ruh ban ioh ia ka jing pynjynsur na ka Act kaba long mynta” ong u Bah Prestone.
Haba kren sha ki nongshah thngan, ula ong “Namar kata, nga kyrpad ia ki briew kiba dang iashong shah thngan, ha ka jaka ban shah tngan, wan iakynduh ia ka Sorkar, iakynduh ia u Myntri Rangbah bad pan ia ka jingpynshai. Nga tharai kane ka long kaba kongsan. Kam mut ba phin leit shong shah thngan bad phin ioh ia kaei kaba phi kwah”.
U DyCM ula bynrap ba ka Sorkar Jyla ka dang wad ia ka lynti ban pynbeit ia kane ka jingeh kaba jwat bha, kaba la pynkha da ki kyndon tih par ba mynta.
