Shillong, Jylliew 17 : Ka Khasi Hills Autonomous District Council (KHADC) kala wanrah ia ka mang tyngka kaba duna T.16.92 lak jong u snem 2026-27 ha ka Dorbar lyiur ba sdang ha ka sngi Nyngkong.
Kat kum ka jingong u Executuve Member ka tnad Finance Seiborlang Warbah, ka ka jingmang pynlut ka long T.214,60,09,410 bad ka jingpynmih pisa ka long T.214,43,16,760.
“Nga kular ba kane ka Executive Committee kan ym sangeh ban wad ia ki lad ki lynti ha kaban pynkiew ia ka jingpynmih pisa jong ka Council, pynjanai ia ka rukom treikam bad bishar bniah bha ia ka jingpynlut khnang ba kan long kaba iaid beit” ong u Bah Warbah haba wanrah ia ka mang tyngka.
Ula kyntu ia ka Iingdorbar ban mynjur ia ka mang tyngka namar ka Vote of Account ba 3 bnai kan sa kut noh ha ka 30 tarik u Jylliew.
“Kumba ngi iatip baroh, ka vote on account ba lai bnai kan kut noh ha ka 30 tarik mynta u bnai, kumta, ka mang tyngka ba pura jong u snem 2026-27 la wanrah hapoh ka Iingdorbar khnang ban lah pyniaid ia ka council” ula ong.
Shuwa ban batai bniah ia ka mang tyngka, u Bah Warbah ula pyntip ia ka Iingdorbar halor ki sienjam ban iada ia ka khyndew ka shyiap jong ki Raid, ki Hima bad ki Shnong ki thaw.
“Ka Executive Committee kala shim ia ki sienjam ban buh da ka kyndon halor ki jaka ka Raid hadien ka jingshem ia ka jingnang lut ki jaka ki Raid lyngba ka jingai sha ki riew shimet bad ki kompani, kaba la iaid da ki phew hectare. Kane ka buh ha ka jingma ia ka lawei jong ki pateng ban wan jong ngi haba iadei bad ki jaka ban rep ban riang lane ban shong ban sah, khamtam na ka bynta kiba duk bad kiba kyrduh” ula ong.
“Namar kata, ban iada bad tyngkai ia ki jaka ki Raid, ka Executive Committee kala rai ban pynjari da ka kyndon halor ka jingai ia ki jaka ki Raid da kaba pynmih ia ka jingpynbna. Kane ka jingpynbna kan treikam mardor hynrei kan ym treikam ia ki jaka bala thied da ka Sorkar Pdeng bad Sorkar Jylla” ula bynrap.
Ka mang tyngka ka tyrwa ban thung ia u Land Recording Officer uba shemphang ha ka GIS ban pyntreikam ia ka DILRMP bad ka KHAD (Regulation and Administration of Land) Act, 2021, hapdeng ka jingnang kiew ki nongaplai ia ka Title Rights Certificate.
Halor ka jingpynmih pisa, u Bah Warbah ula ong ba ka Executive Committee kala pynlait ia ka bilingual pamphlet hapoh ka “Meghalaya Professions, Trades, Callings and Employment Taxation Act, 1947” ban pynsngewthuh ia ki nongsiew khajna, khamtam ha ki Unorganised sector.
Halor ka song pisa na ka Sorkar Pdeng, ula pynpaw ba ka 16th Finance Commission kala mang T.1,479 klur ia ka Meghalaya Rural Local Bodies naduh u snem 2025-26 haduh 2030-31, bad ka bhah ka KHADC jong u snem 2026-27 ka long T.85.50 klur ka ban phiah sha ka Basic bad Performance Grant ba 80:20.
U bynrap ba ka Coyncil ka dang ap ban ioh sa T.12.15 klur hapoh ka installment kaba ar jong ka 15th Finance Commission Untied Grant 2022-23.
U Bah Warbah ula pyntip ruh ba ka Council kala iasoi ia ka MoU bad ka IORA Ecological Salution Pvt na ka bynta ki kam thungdieng ne pynrben biang ia ki khlaw bad ki carbon project.
