Shillong, Jylliew 16 : U Myntri Rangbah ka Jylla Conrad K Sangma ha ka sngi Ba-ar, ula ong ba ka Sorkar Jylla kala hukum ban pynlong ia ki Football League ha man ki Block ka Jylla ban ailad ia ki samla na man ki shnong ia ka daw ba kin iashim bynta ha ki jingialehkai, haba pynpaw ba wat ka sienjam kaba rit ruh tang kum ka jingialehkai ha ka sngi Saitjain ka lah ban pynjngai ia ki na ki kam sniew.
Haba kren ha ka Meghalaya Sports Conclave, u Myntri Rangbah ula batai ia ki jingpynleit jingmut jong u ha ki lympung ialehkai phutbol kaba sdang na ki shnong ki thaw.
“….Nga la dep ai ia ka hukum ban pynlong ia ki league match jong ngi ha man ki Block. Ngi don 56 tylli ki Block ha ka Jylla. Kumta, kaei kaba nga kwah ka long ba nga kwah ia ki samla jong ngi kiba don ha shnong Selsella kiba dang pule klas VIII, IX bad X kin mih ban ialehkai ha kane ka league ha Selsella Block ha ka sngi Saitjain bad kilan met ha ka sngi Nyngkong haduh Thohdieng hadien ba wai skul bad pynlut ia ka por jong u ne ka ha kaba pynleit jingmut ia kane ka jingialehkai bad ban ap ia ka sngi ialehkai ha ka sngi Saitjain ha ka jaka ba kin samla kin leit bad leh ia ki kam sniew” ula ong.
Katba ki takma kin iai long ka thong, u Conrad ula ban jur ba ka jingdonkam ba hakhmat eh ba hap leh mar mar ka dei ka jingiashimbynta ha ki shnong ki thaw.
“Hooid, Katba nga kwah takma, ngi lah ruh ban iarap bad kyrshan bad ai kalad ia ki khynnah ba kin lah ban phaikhmat sha ki jingialehkia league ha Selsella Block ha ka sngi Saitjain bad pynjnai ia u/ka na ki kam sniew. Nga ngeit kane hi ka dei ka jingjop kaba kongsan kaba ngi la leh” ula pynpaw.
U Myntri Rangbah ula shim ia kine ki jingpyrshang kiba sdang na ki shnong ki thaw kum ki maw nongrim jong ka thong kaba kham heh. “Kine ki dei ki kam kiba rit. Ki kam kiba heh ki dei kiba kongsan hynrei man ki kam kiba rit ruh ki nang bynrap ia kaei kaba ngi kwah ban leh” ula ong. Ula pynpaw ruh ba ka jingbahkhlieh jong ka Sorkar ka long kham palat ban ia ki nongialehkai kiba tbit.
“Ha nga, ki nongialehkai kiba iashong hangne ki long kongsan bha bad ngin leh ia kaei kaba dei ban leh ha kaban kyrshan ia phi hynrei sa shisien kumba nga ong, ka khana kam dei tang shaphang jong phi hynrei ka khan aka long ia man ki khynnah bad ki samla jong ka Jylla jong ngi” bynrap u Conrad.
Ula ong ba ka jingkyntur ia ki kam ialehkai ka dei kaba don jingiadei bad ka thong kaba kham heh jong ka Jylla.
“Ngi kwah eh ban peit ba ngi lah ban ai ia ka kabu khnang ban gin lah ban tei ia ka Meghalaya kaba kham bha bad kaba khlain bad ka Megalaya kaba kham bha bad ba khlain kan pynlong ia ka ri India kaba kham bha bad ba khlain. Kane ka dei shisha kata ka thong jong ngi” ong u Myntri Rangbah.
