Shillong, June 16: Arphew Saw ngut ki samla pule na kylleng ka Jylla Meghalaya kila pynkhreh ban leit Educational Exposure sha ri Malaysia hadien ba ki jop ia ki jingiakob ba la iashimbynta da palat 1,200 ngut hapoh ka Chief Minister’s Youth Programme.
Ki samla pule kiba la jied na ki jingpule bapher bapher kaba kynthup ia ka Arts, Culture, Innovation, Science, jinglong nongialam bad kiwei kiwei kila shah jied lyngba ka jingiashimbynta ha kiba bun tylli ki wat jong ka jingiakob bad ka jingshah khmih bniah kaba la pynlong hapoh ka Jylla ban tei ia ka jinglong jong ki samla.
Kane ka jingleit shabar ri kadei kaba la pynwandur ban ai ia kine ki nongjop ia ki jingtip kiba paka bad ban sngewthuh ia ka jinglong jingman shabar ri, kaba plie lad ia ki ban iakren bad ki jaka pule, ban sngewthuh shaphang ki jingleh ha kiwei pat ki ri bad ban nang pyniar ia ka jingtip ka jongki shaphang ki lad ki lynti shabar jong ka ri India.
Kane ka prokram kadei shi bynta jong ka jingpyrshang ka jylla Meghalaya ban kynshew tyngka ha ki khynnah ban tei ia ka jinglong nongialam, ka jingsam mar kylliang ia ka kolshor, ban leh ia kiei kiei kiba long thymmai bad ki sienjam ban tei ia ka sap ka phong. Kane ka Youth Engagement Programme jong ka Sorkar Jylla kadei kaba la nang pyniar ha kine ki snem kiba la dep, ha kaba ki nongiashimbynta kila kiew shaphrang na ki jingiakob ha ka Block-Level bad District-Level sha ka National bad ha ki rynsan iakob ha ka pyrthei.
Katto katne na kine ki khynnah pule kiba la shah jied kila pynpaw ba kane ka kabu kadei ka jingurlong shisha jong ka jingangnud ka jongki bad ong ba kane ka jingioh lad ka jongki kan iarap shibun ha kaban tei ia ka jingskhem jingmut, ban tei ia ka sap ha ka jinglong nongialam bad ban pynkhreh na ka bynta ka lawei da kaba pyniasoh lang bad kane ka pyrthei.
U Myntri Rangbah u Conrad K. Sangma ula iai ban ba ka jingpyndonbynta ia ki samla bad ka jingialam shabar ri kadei ka jingshim ia ka sienjam ban wanrah ia ka jingkylla da ka jingthmu ban pynkhreh ia ka Meghalaya ban sei ia ki nongialam, ki nongsengkam lajong, ki nongleh ia kiei kiei kiba thymmai ha ki pateng ban wan. Ha ka prokram kaba ha u snem ba la dep, la plie lad ban ialam shabar ri ia ki samla pule kiba tbit bad kiba stad.
Ki ophisar kila ong, ba kane ka sienjam kam dei tang ka jingai khusnam hynrei kan ai mynsiem ia ki khynnah ha kylleng ki bynta jong ka jylla ban ialeh ban pynurlong ia ka thong ka jongki bad ban iakhun ha ki rynsan ha ka ri bad ha ki rynsan jong kane ka pyrthei.
