Shillong, Jylliew 13: U Myntri ka pule puthi u Bah Lahkmen Rymbui hynne ka sngi Saitjain, ula kyntu ia ki samla pule na Telangana kiba wan iashimbynta ha ka Yuva Sangam Exchange Programme ba kin long ki Nongrah Tiensyiem ne Ambassador jong ka Meghalaya bad ka thain Northeast, da kaba rah ia ka jingsngewthuh kaba ngam jylliew ha kaba iadei bad ka thain bad ba kin sam ruh ia ka jingshem ka jongki bad kiwei pat.
Haba ai jingkren ha ka jingialang pynkut jongka Yuva Sangam Phase-VI ha IIM Shillong, u Bah Rymbui ula ong, ba ka jingiasam mar kylliang ha kaba iadei bad ka pule puthi bad ka kolshor kadei ka bynta kaba kongsan ha kaban pynkhlain ia ka jingiadei hapoh ka ri da kaba weng ia ka jingiapher jingmut bad ban kyntiew ia ka jingiasngewthuh jingmut bad ka jingburom mar kylliang hapdeng ki samla na kylleng ki bynta jong ka ri.
Ula ong, ba ka kynhun na Telangana hapoh ka jingialam jong NIT Warangal, kham mynshwa kadei kaba la ioh ia ka jingshemphang ha kaba iadei bad ka kolshor, ka riti dustur bad ia ka rukom im ha ka jylla Meghalaya ban ioh ia ki jingtip kiba paka ha kine ki 5 sngi jong ka jingwan sah hapoh ka jylla bad kan iarap ha kaban kyntiew kham bha ia ka jingsngewthuh ia ka thain shatei lammihngi.
“Man la ki thain, ki noh synniang sha ka jingkhlain jongka ri. Ka ri India kaba don byllai ki jaidbynriew kadei ka jingkhlain ka jongka bad ki prokram kum ka Yuva Sangam ki iarap ha kaban tei ia ka jingiadei kaba skhem ha kylleng ki jylla” la ong u Myntri bad ka pynshlur ia kane ka kynhun kaba wan jngoh ban noh synniang ha kaba iadei bad ka jingiohi jngai jong ka Viksit Bharat.
La pynkut ia kane ka prokram jong ka jingsam jingtip mar kylliang kaba la pynlong hapoh ka Ek Bharat Shreshtha Bharat kaba dei ka prokram jong ka Sorkar Pdeng.
Hashwa kane, katei ka kynhun kala iakren bad ki nongialam jong ka Dorbar Shnong Mawpat ban sngewthuh ia ka rukom leh hapoh ka jylla Meghalaya ha kaba iadei bad ka kam synshar khaddar bad kila leit ruh ban jngoh ia ka NEHU bad ia ka Sports Authority of India Centre kaba don hapoh jong katei ka skulbah.
Ki nongiashimbynta kila pynsngew ia ka jingshem ka jongki ha kine ki 5 sngi jong ka jingwan bad kumno kala pynsngewthuh bha ia ki shaphang ka thain shatei lammihngi bad kala iarap ban tei ia ka jinglong paralok kaba la ngam jylliew lyngba ka jingsam mar kylliang ia ka kolshor bad ka jingburom mar kylliang.
Ha kane ka sngi la ioh ruh ia ka jingpyninam ia ka kolshor na u nongrwai ba pawnam ban rwai ia ki jingrwai Khasi u Bah Lam, ki khynnah na ka kynhun jong ka nongioh khusnam Padma Shri ka Kong Silbi Passah bad ki nongiashimbynta na ka jylla Meghalaya bad Telangana kila rakhe da ka jingkmen ia ka jingiatylli bad ka jingiar jong ki jaidbynriew ha ka ri.
