New Delhi, Risaw 04 : Ka Telangana, Haryana bad ka Tamil Nadu kila wan ha ka kyrdan kaba hakhmat eh napdeng baroh ki jylla kiba kham heh haba phai sha ka jingkhuid jingsuba ha ki thain nongkyndong, katba ka Assam Bihar bad ka Jammu and Kashmir kiba kiba wan ha ka kyrdan kaba shadien tam.
Ka president Droupadi Murmu ha ka sngi Saitjain ba la lah kala pyllait ia kane ka jingioh lum jingkhein ba ju pynlong da ka sorkar pdeng lyngba ka jingleh sorbe kaba man la ka snem.
Katkum ka Swachh Survekshan Grameen (SSG) 2022, ka Golaghat district ka Assam ka dei kaba wan ha ka kyrdan kaba shatrai tam napdeng ki 709 tylli ki district ha kaba iadei bad ka khuid ka suba. Ki artylli kiwei pat kiba wan shadien tam ki kynthup ia ka Banka ha ka kyrdan kaba 708 bad ka Katihar 707 kiba hapoh ka jylla Bihar.
Ia ka kaiphot lyngba ka jingleh sorbe na ka bynta ki jylla bad ki district la pynlong shi bynta ban pynneh pynsah ia ka jingkhuid jingsuba hapoh ki thain nongkyndong.
Katba ka tnat housing bad ka tnat urban affairs kila shimti ban khmih ha kaba iadei bad ka khuid ka suba (swachhta) ha ki jaka sor, ka tnat Jal Shakti ka la shimti ha kaba iadei bad ka jingleh sorbe ha ki thain nongkyndong.
Ha ka lyngkhuh sngi kha jong u Mahatma Gandhi (Gandhi Jayanti) ia kaba mynta la rakhe kum ka ‘Swachh Bharat Diwas,’ na ka liang ka president Murmu kala pyllait ruh ia ka kaiphot kaba iadei bad ka jingpyntreikam ia ka skhim sam um ha man la ki thliew iing lyngba ka Jal Jeevan Mission.
Ka Puducherry kala wan ha ka kyrdan kaba hakhmat eh ha kaba iadei bad ka jinglah ban pyntreikam sted ia kane ka skhim sam um, kata haduh palat 60%, katba ka Goa kala wan ha ka kyrdan kaba ar.
Kiba hap hapoh ka 60% ki kynthup ia ka Tamil Nadu ha ka kyrdan kaba nyngkong bad ka Meghalaya ha ka kyrdan kaba ar.
