Shillong, Jylliew 17: Ka Iingkashari Meghalaya High Court hynne ka sngi thohdieng, kala bthah ia ka Sorkar Jylla ban pynbeit bad pynduh jait ia ka jingleh politics, kaba long diengpyngkiang ban pynbeit noh ia ka kam theh ñiut ka Sor Jowai, ka Headquarter ka West Jaiñtia Hills District.
“Ka Sorkar Jylla ka dei ban kham shikhia shuh shuh, tang ban lah pynkut ia ka jingleh politics” ong ka Iingkashari jong ki arngut ki nongbishar ba kynthup ia u Chief Justice Sanjib Banerjee bad Justice W.Diengdoh haba shong bishar ia ka mukotduma bala mudui da ka Synjuk ki Waheh Chnong, Jowai.
Ka Iingkashari ka ong ba watla kaei kaba paw ka pyni ba kala kham biang, hynrei ym shym la paw dak satia pat ba kan don ka jingpynbeit ka ban long shirta.
“Ka don ka jingsngew jong ka Iingkashari ba ka jingiapyrkhat ban pynhun iano iano ha ka kam saiñ pyrthei ka lah ban dei ka daw kaba kah lynti ban shem ia ka jingpynbeit ba shirta” kala ong haba ban jur “La kyrmen ba ki briew kiba pyrshang ban pynsahteng ia kane ka kam ne ban ithuh ia ka jaka kaba biang eh, kin kylla noh ha ka jingmut jingpyrkhat”.
Na ka liang ki nongmudui kila pynpaw ba ka jinglong jingman kala kham biang mynta bad ka Jowai Municipal Board kala pyntip ba ka jinglum ia ki ñiut kala iaid manla ka sngi bad la leit theh sha ka jaka ba la ithuh kum ka jaka theh ñiut ba shipor.
Ka Iingkashari kala buh ban song bishar biang ia kane ka mukotduma ha ka 25 tarik u Naitung.
