Shillong, Jylliew 09: Kum ka Sor kaba mad ia ka jingeh na ka jingkhapngiah bad ka jingiai mih ki kali, ka jingsdang pyniaid ia ki 5 tylli ki bos elektrik ne Electric Bus ha ka sngi baar ka long kaei kaei kaba kham kongsan ban ia ka jingmih ki kali thymmai ha ki surok.
Kane ka dei ka jingsdang kaba thymmai ha ka jingpynkylla ha Sor Shillong sha ka bynta jong ka jingkhuid bad ka leit ka wan ki paidbah kaba don ia ka jingshaniah.
U Myntri Rangbah ka Jylla u Conrad K. Sangma ula kaweh ia ka lama jong kine ki bos elektrik kiba nyngkong hapoh jong ka PM eBus Sewa Scheme, da kaba ong, ba kane ka sienjam kadei shi bynta jong ka jingthmu kaba iar ban pynduna ia ka jingkhapngiah, ban pynbha ia ka leit ka wan bad ban pynshlur ia ki nongshong shnong ba na ka jingpyndonkam ia ki kali shimet sha ki kali paitbah.
Kine ki bos kiba don ia ka jingpynmih ia ka lyer kaba pjah, syaid ne Air-Conditioner, ne ki bym pynmih ia ka tdem ne Zero-Emission kidei kiba lah ban iaid haduh 200 kilomitar da kaba Charge tang shisien ryngkat bad ka jingdon ia ka lad ban pynrung ia ki Wheelchair na ka bynta kito ki bym lah iaid, ka jingot tiket da ka kor Digital bad ka jingpyniaid da ka jingdon ruh ia ki GPS.
Watla ka jingpyllait ka long shwa tang ia ki 5 tylli ki bos elektrik ha ka wat kaba nyngkong, ki ophisar kila pyntip ba ha Shillong lah dep ban bhah haduh 50 tylli ki bos elektrik hapoh jongka Scheme. Da kaba bynrap lang ia ka jingdon hapoh sor ia ki bos kiba iaid da ka umphniang Diesel, ki bor kiba dei peit kila khmih lynti ba jan kumba 150 tylli ki bos kin treikam ha ka por kaba la buh ha kine ki 6 bnai kiban wan.
Kane ka nombar ka kdew ia ka buit kadei kaba lah ban kit khia.
Katkum ka jingpynpaw jong ka Tnad Urban Affairs, ka jingshong bos ki paitbah ha Shillong kala kiew na ka 300 ngut ha ka jingsdang sha kumba 3,000 ngut ki nongshong bos ha ka shi sngi hapoh jong ka shi bnai. Da ka jingpyniar ia kane ka jingshakri, ka sorkar ka khmih lynti ba ka leit ka wan jong ki paitbah kan kynjoh sha ka jingai jingshakri ia kumba 60,000 ngut ki nongleit nongwan man la ka sngi.
“Ka jingthmu ka long ym tang ban shu pyniaid ia kitei ki bos. Hynrei ka jingthmu ka long ban thaw ia ka rukom leh kaba shngain, shaniah, kaba lah ban iatahuhlypa bad kaba suk ia ki nongshong shnong baroh ban ioh ia ka lad” ong u Myntri Rangbah u Conrad K. Sangma.
Ki Ophisar kila ngeit skhem ba jingwanrah ia ka jingshaniah ia ki paitbah ha ka leit ka wan kan long kaba kongsan bha ban iakhun ia ka jingeh jong ka jingdheng kali hapoh ka nongbah Shillong.
Na ka bynta ki nongleit nongwan, ka jingwan ki bos elektrik ka long kum ka jingmihkhmat ia ka leit ka wan kaba khuid ba suba bad kaba jar jar ha ka rukom iaid. Na ka bynta ka nongbah, kadei ka dak jong ka jingkylla sha ka leit ka wan kaba iai neh iai sah.
Kine ki bos ki lah ban don tang khyndiat tylli ia mynta, hynrei kin kit pat ia ka thong kaba iar, ka lawei kaba ka Shillong kaba bun ki briew, ban duna ki kali bad ka jingpynmih tdem kaban duna bha.
