Shillong, Jylliew 05 : Ka Sorkar Meghalaya kala wanrah haduh 1 lak hectare ka jaka hapoh ka prokram iada bad peitthuh ia ka mariang lyngba ka prokram Afforestration and Payment for Ecosystem Sevices, ong u Commissioner & Secretary ka tnad Tourism, Vijay Kumar D,ha ka jingrakhe ia ka World Environment Day 2026 ha ka sngi Thohdieng.
Haba kren ha Mawrah, East Khasi Hills, u Kumar ula kren halor ka jingkiew shakhmat ka Jylla ha ka kam iada mariang bad ka roi ka par kaba neh, bad ong ba ka jingriewspah ka Meghalaya ha ka jingdon ia ki khlaw ki btap bad ki jingthaw b aim kala pynlong ia ka kam iada mariang kaba kongsan na ka bynta ka lawei jong ka.
U iathuh ba ha kine ki san snem bala leit, ki kam thungdieng kila iaid ha jan kumba 25,000 hectare bad sa 14,000 la buh thong ban leh mynta u snem.
“Kane kan wanrah ia kumba 40,000 hectare baroh lang hapoh ka prokram thungdieng bad iada mariang” ong u Kumar.
Haba pynbna ia u mawmer ba kongsan, ula bynrap “Lyngba ka jingwanrah lang ia ka prokram Afforestration bad Payment for Ecosystem Services, ngi la lah ban wanrah hapoh 1 lak hectare ka jaka hapoh ka prokram ai jingiada bad jingpeitthuh”.
Ula ban jur ia ka jingshim bynta lang jong ki Tnad bapher bapher halor ki jingsumar bad pynneh pynsah ia ka mariang.
“Ki Tnad ha ki kam bapher bapher kila synniang lang ha ka liang ka jingpynneh pynsah ia ka um, pynneh pynsah ia ka khyndew, ka eco-tourism, ka jingiada ia ki jingthaw b aim bad ka kamai jakpoh kaba neh” ula ong.
Ula kren ruh halor ka jingkiew sted ki kam jngohkai ha Meghalaya bad pynpaw ia ka jingdonkam ban pynbiang ia ka ijing nang bun ka jingwan ki nongjngohkai bad ka jingpynneh ia ka mariang.
Haba kdew sha ka Mawrah, u Kumar ula ong ba kane ka jaka ka long kum ka nuksa ba kumno ki jingkynshew kiba da thmu, ki lah ban pynkhlain ia ka jinglah kyrda ka mariang bad ka kamai jakpoh ki trai shnong.
