Ong u Dr Mansukh | Ka National Games ha Meghalaya kan buh ia ka kyrdan ba thymmai | Pynbna T.150 klur ban tei ia ka Training Centre

Shillong, Jymmang 30:U Myntri ka Sorkar Pdeng uba khmih ia ka Youth Affairs & Sports u Dr Mansukh Mandaviya hynne ka sngi Saitjain ula ong ba ka 39th National Games ha Meghalaya ha u 2027 kan buh ia ka kyrdan kaba thymmai ha ka histori jong kane ka lympung iakob ialehkai” haba pynbna ia ka song T.150 klur ban tei ia ka world-class high-altitude training centre ha jylla.

U Dr Mandaviya ula lum ia ka jingialang jongka high-level review meeting ha Shillong ban khmih ia ka jingpynkhreh ka Meghalaya ban pynlong ia ka National Games.

Ha kane ka jingialang la wan ban iashimbynta da u Myntri Rangbah ka jylla u Conrad Sangma, u Myntri Khynnah uba khmih ia ka Youth Affairs & Sports Raksha Khadse, ka President ka IOA ka PT. Usha, u myntri ka kam ialehkai ka jylla u Bah Wailadmiki Shylla, ki heh ophisar ka tnad ialehkai na ki 8 tylli ki jylla ka thain shatei lammihngi bad ki heh ophisar na ka Ministry of Youth Affairs & Sports.

Ha kane ka jingialang u Myntri ka Sorkar Pdeng ula ong ba “Kane ka jingialehkai kam dei ban long tang kum ka lympung iakob ialehkai hynrei kan dei ruh ka rynsan ban pyninam ia ka kolshor bad riewspah bad barim bajah, ka jinglong tynrai bad kyrpang ka Meghalaya, ka thain shatei lammihngi baroh kawei sha ka ri bad ka pyrthei”.

Ula pynpaw ia ka jingkongsan ia ki jingtei kiba don ia ka kyrdan ha ka pyrthei, ka jingtrei ryntih ki kynhun bad ka jingiashimbynta bha jong ki paitbah” ban pynlong ia kane ka jingialehkai kaban sah nam.

“Ka jingiaineh bad ka jingiar kadei ka khubor jong ngi ha ka National Games kaba 39 ha Meghalaya ha u snem 2027” la ong u Dr. Mandaviya.

Ula bynrap ba da ka jingpynlong bun ia ki jingialehkai hapdeng ki jylla kiban pynlong ia ki jingialehkai, ka National Games kadei ban pynleit jingmut ha kaban ithuh ia ki sap bad ka jingwad ia ki nongialehkai kiba tbit.

Ula iawer ba dei ban pyndonkam ïa kane ka lympung ialehkai “Kum ka lad ha kaban pynsaphriang ia ki jingtip halor ka jingpyndonkam da ki dawai pynkhlain” bad ka ong “Dei ban pynsngewthuh ïa ki nongïalehkai shaphang halor ka jingktah jong ka jingpyndonkam ia ki dawai pynkhlain”.

U Myntri ula bthah ia ki dkhot jong ka MY Bharat kidei ban iadonbynta lang ha ka por ba pynlong ia ka National Games ha Meghalaya.

Ha kane ka jingialang, la ai ia ka jingbatai kaba bniah hakhmat u Myntri halor ka jinglong jingman jong ki projek na ka bynta ki jingdon jingem ha ki kam ialehkai, ka jingpynkhreh ia ki jaka, bad ki jingpynkhreh baroh na ka bynta ka 39th National Games 2027, kynthup ia ki por ban pyndep bad ki bynta ba kongsan kiba donkam ban phaikhmat bha.

U Dr. Mandaviya, uba wan ban jngoh 3 sngi ia ka thain shatei lammihngi, ula plie paidbah ruh ia ka Multipurpose Integrated Sports Indoor Hall ha Shillong.

Ula ong ba kane ka jaka “Kan plie ki lad bathymmai ia ki samla nongialehkai bad kan long ruh ka bynta kaba kongsan ha kaba pynwandur ia ka lawei jong ka kam ialehkai ha Meghalaya bad ha ka thain shatei lammihngi”

Ula pynbna ruh ba shen yn sa shna ia ka High-altitude training centre, kaba katkum ka juk mynta ha Meghalaya kaba shongdor T.150 klur.

Haba ïaroh ïa u Myntri Rangbah ka Jylla Meghalaya u Conrad Sangma, u Dr. Mansukh Mandaviya ula ong. “Ba ka jylla ka la sakhi ïa ka jingkiew kaba kongsan ha ka kam ïalehkai ha kine ki phra snem ba la dep hapoh ka jingïalam jongu.Ula shim ia ki sienjam kiba pura bad kiba shemphang ban pynkhlain ia ki kam ialehkai ha Meghalaya. Naduh ka jingkyntiew ia ka Sports Science bad ki jaka ai jinghikai katkum ka juk mynta ban pynbiang ia ka lad ban lap ia kiba don sap bad ruh ki prokram ban kyntiew ia ki nongialehkai ha ki jaka nongkyndong, u Myntri Rangbah ula pyni ia ka nuksa na ka bynta kiwei kiwei ki jylla”.

U Myntri Sorkar Pdeng ula ong, “Haba ka jylla kum ka Meghalaya ka wan shakhmat ban pynlong ia ka National Games, ka long ka jingsngew sarong ia baroh kawei ka ri. Kane ka thain kala pynmih shibun ki nongialehkai kiba tbit bha bad ruh ban pynlong ia kane ka lympung ialehkai kan pynkhlain shuh shuh ia ka jingkyntiew ia ki kam ialehkai, kan ai mynsiem ia ki nongialehkai kiba dang khynnah, kan pyni ia ka kolshor kaba riewspah bad ka jinglah jongka thain shatei lammihngi sha baroh kawei ka ri.

“Nga la khmih ia ka jingpyniaid shakhmat jong ki jingdon jingem bad ka jingpynkhreh na ka bynta ka National Games ba 39 ha Meghalaya bad nga lah ban ong da ka jingskhem jingmut ba ka National Games 2027 kan long ka nuksa kaba thymmai ha ka histori jong kane ka lympung ialehkai,” la bynrap u Myntri.