Shillong Jymmang 30: U Symbud Myntri Rangbah ba khmih ia ka PWD Roads & Buildings Bah Prestone Tynsong, haka sngi Saitjain ula plie paidbah ia ka surok Dr Friday Lyngdoh Road kaba sdang na Mission Compund, Wahthapbru shaduh Jaiaw Pdeng.
U Bah Prestone ula plie ia ka jingthoh ne Signboard Dr Friday Lyngdoh Road ha ka jingdon ryngkat ki khun bad ki bahaiing bahasem u Dr Friday, u MLA ka North Shillong Bah Adelberth Nongrum, MDC bad Chairman ka KHADC Bah Strong Pillar Kharjana, ki nongialam shnong ka Mission Compund, Wahthapbru, Jaiaw Pdeng, Mawkhar, Umsohshun, Wahingdoh, Riatsamthiah bad kiwei kiwei.
Ka jingainam ia kane ka surok ka long kum ka dak ban pynsahnam ia u MLA barim ka Mawkhar Constituency Dr Friday Lyngdoh uba long ruh u Tymmen Basan ka Balang Presbyterian Mawkhar, uba la noh synniang bha sha ka imlang sahlang bad ia ka jylla baroh kawei.
Haba kren ha ka jingialang kaba la long ha ka Dorbar Hall jong ka Mission Compound u Bah Prestone ula ong, ba ula iatrei lang bad u (L) Dr Friday Lyngdoh hapoh ka seng Congress naduh u snem 2003 haduh 2013 bad u Dr Friday ula long kum u nonghikai bad u nongialam lynti bad udei ruh u nongialam uba trei na ka bynta ki paitbah bad noh synniang bha ia ka jylla.
U Bah Prestone ula pynkynmaw ruh ba ha ka por ba ula leit sha Delhi ryngkat bad u Dr Friday ban iakynduh ia ka Sonia Gandhi bad kaba phylla ka long ba kim shim la donkam ban bud ryntih ia ki kyndon hynrei ka Sonia kala wan hi dalade ban wan shaw ia u Dr Friday Lyngdoh naduh na varendah.
Ula ong ruh, ba u Dr Friday udei u rangbah uba shakri ia ka bha ka miat ki paitbah bad uba iengskhem ha ka nongrim bad ym ju don ruh ia kino kino ki nongshun bad ula kyntu ia ki khun bad ia ki bahaiing bahasem bad kidei ban bud ia ki nuksa ba bha jong une u radbah.
