Shillong, Jymmang 30: U Lat ka Jylla u CH Vijayashankar ha ka sngi Thohdieng, ula lum ia ka jingialang ha Lok Bhavan bad ki khynnah kiba la ioh ia ka jingmyntoi na ka Post-Matric Scholarship (ST) bad ula pynthikna ia ki khynnah pule ba ka jingsngewkhia ka jingki halor ka jingioh slem bad ki jingeh kiba la mih kin dei kiba un shimkhia bad ki bor kiba dei khmih ba kin pynbeit noh.
Kane ka jingiakynduh kadei shi bynta jong ka “Birsa Lives in New Bharat” ia kaba la pynlong ha ka ri baroh kawei ia ka jingrakhe ia ka Janjatiya Garima Utsav naduh ka 10 tarik u Jymmang haduh ka 9 tarik u Jylliew 2026.
Kane ka jingrakhe ka long kum ka jingburom ia ka burom, ka jingsah nam jong ki barim bajah, ka jingnoh synniang bad ka jingseisoh jong ki jaidbynriew riewlum bad ban pyni ruh ia ki skhim ban pynkup bor ia ki riewlum.
U Additional Chief Secretary jong u Lat ka Jylla u HC Chaudhary, u Commissioner and Secretary ka tnad pule puthi u Bah Ryntihlang Rapthap bad ki ophisar na ka tnad pule puthi ruh kila donlang ha kane ka jingialang.
Ha kane ka jingiakynduh, u Lat ula iakren markhmat bad ki khynnah pule na ki skul na ki district ki bapher bapher jong ka jylla bad ula pan ruh ia ka jingshem ka jongki halor ka jingpyntreikam bad ka jingioh jingmyntoi na ka Umbrella Post-Matric Scholarship Scheme ia ki khynnah pule kiba dei ki Scheduled Tribe.
Ki nongioh jingmyntoi kila ong, ba ka scholarship kala iarap ha kaban pynlut pynsep ha ka pule puthi kum ka jingsiew ia ka bai khreh kot, ka bai ialeh eksam, ka jingsiew ia ka jingsah Hostel, ban thied ia ki kot bad kiwei kiwei ki jingdonkam kiba iadei bad ka pule puthi. Kila pynpaw ba ka scheme kala pynduna ia ka jingeh ha ka pisa pilain jong ka iing ka sem bad kala plie lad ia ki ba kin bteng ia ka jingpule ka jongki da ka jingskhem jingmut.
Ki khynnah pule kila pynpaw ruh ba kane ka skhim kala wanrah ia ka jingkylla ha kaban kyntiew ia ka jingpynkupbor ha ka pule puthi, ka jingiohlad kaba mar katjuh bad ka jingiashimbynta bha ki samla riewlum ha ki jingpule ki bapher bapher.
Ha kajuh ka por bun ki khynnah pule kila pynpaw ia ki jingeh kaba ki mad kaba kynthup ia ka jingpynshisha lyngba u Aadhaar, ka jingslem ha kaban pynshisha ia ki kot ki sla, ki jingeh kaba ki mad haba ki leh ia ka online portal, jingslem ha kaban ioh ia ka scholarship bad jingduna palat ha kaban ai iaki jingpynsngewthuh ia ka rukom aplai na ka bynta ki khynnah pule kiba na ki jaka nongkyndong.
Ha kaba iadei bad kitei ki jingsngewkhia, u Lat ula pynthikna ia ki khynnah pule ba kane ka jingai jingtip kaba kordor ka jongki kadei kaba yn sa pyntip sha ki bor kiba dei khmih ba kin leh ia kaba donkam.
Ula banjur ia ka jingdonkam “Ban pynkhlain ia ki jingai jingpynsngewthuh, ban pynsuk ia ka rukom aplai, ban kyntiew ia ki lad ban ai jingkyrshan bad pynthikna ban pynbeit mardor ia kitei ki jingeh khnang ba yn ym don kino kino ruh ki khynnah pule riewlum kiban duh ia hok jong ka jingioh jingmyntoi na ka scholarship scheme.”
U Lat ula ong, “Ki khynnah pule kidei ki lawei jong ka imlang sahlang bad ka jingpynang pynstad ia ki kan ialam ha kaban pynneh pynsah ia ka kolshor tynrai, ban pynkhlain ia ka jinglong nongialam hapdeng ki samla riewlum bad ban tei ia ka ri kaba khlain bad kaba long salonsar ia baroh”.
Ula pynshlur ia ki ba kidei ban long kiba kut jingmut ha ka jingpule ka jongki, ban pyndonkam pura ia ka lad kaba ki ioh na ki sienjam kiba la shim da ka sorkar bad ba kin iakhun tyngeh ban pynseisoh ia ka thong ka jongki.
U Lat ula pynpaw ba ka pule puthi kadei kawei na ki atiar kaba khlain tam bad kaba lah ban wanrah ia ka jingkylla ia ka imlang sahlang bad ia ka ioh ka kot jong ki jaidbynriew riewlum bad ka ong, ba ki scholarship scheme ka sorkar kila plie lad ia ki khynnah kiba dei hok na ki thain nongkyndong bad kiba duna ha ka ioh ka kot ba kin bteng ban pule ha ki kyrdan kiba heh bad ban pynurlong ia ka jingangnud ka jongki.
Kane ka Umbrella Post-Matric Scholarship Scheme ia ki ST Students, kadei kaba la bei tyngka Ministry of Tribal Affairs, kaba ai jingiarap pisa ia ki samla riewlum ne Scheduled Tribe kiba pule ha ki kyrdan kiba shajrong.
