Shillong, Jymmang 29: Ka Nongkseh SSCC kala jam sha ka Final jong ka 5th Meghalaya State League da kaba pynrem ia ka Rymbai Shkenshynriah SC da 3-0 ha ka jingiakhun Semifinal kaba nyngkong hynne ka sngi Thohdieng ha madan SSA Stadium.
Kane ka jingiakhun kala long kaba shongshit hapdeng ka jingwan sakhi bad ka jingdap smam da ki paitbah kiba la wan ban peitkai ia ka jingiakhun hapdeng ka Nongkseh pyrshah ia ka Rymbai Shkenshynriah ha ka MSL kaba la pynlong da ka Meghalaya Football Association lyngba ka jingkyrshan jong ka Directorate of Sports and Youth Affairs ka jylla naduh u snem 2017.
U Arlangky Nongsiej ula ioh ban thep ia ka kol kaba nyngkong ha ka minit kaba 39 jong ka kylla step bad ha ka kylla miet ruh ka Nongkseh kala ialehkai bha bad kala ioh thep sa 2 kol lyngba u Chesterpaul Lyngdoh ha ka 75 minkit bad u Hardy Cliff Nongbri ha ka minit kaba 86 ha kaba ula ioh pdiang ruh ia ka khusnam Hello Meghalaya ‘Man of the Match’ bad ula ioh pdiang ia ka song pisa kaba T.10,000 bad ka memento na u Director ka NEIGRIHMS u Dr Nalin Mehta.
Ka Shkenshynriah kaba dei ka kynhun na East Jaintia Hills kadei kaba la ioh rung teng sha ka semifinal jong ka MSL 4 kaba la long ha u snem ba lah dep, hynrei kane kadei ka sien kaba nyngkong ia ka Nongkseh ba kan iashimbynta ha kane ka lympung iakob ialehkai football.
Ka Nongkseh mynta kala ioh rung sha ka Final bad kan iakynduh ia ka kynhun kaban rah ia ka jingjop ha ka jingiakhun ia ka Semifinal ka baar kaban long hapdeng ka Langsning FC pyrshah ia ka Shillong Lajong FC kaban long lashai ka sngi Siatjain.
Ka Semifinal ka Baar kan long ka jingiakhun kaba itynnad bad kan sdang ha ka por 6 baje janmiet ha SSA Stadium.
Ka Langsning kala long ka lahduh ha ka Group B da kaba jop 5 sien bad rem shisien. Ka Langsning kala ioh rung tang shisien ha ka semifinal jonga ka MSL kaba la long ha ka snem 2017 hynrei kala shah pynrem noh ha ka Tynrongmawsaw SC.
Katba ka Shillong Lajong ha ka jingiaid lynti ban ioh rung sha ka semifinal kala mad ia ka jingshah rem tang ha ka Nongkseh bad kadei ka kynhun kaba la rah teng ia ka nam lahduh jong ka MSL ha u snem 2019 hynrei ha ka MSL 4 pat ka Lajong kala shah pynrem noh ha ka final.
