Shillong, Jymmang 29 : U Symbud Myntri Rangbah Bah Prestone Tynsong ula pyntip ba ka Police Station bad Fire Station kin sa mih shen hajan ka Jingkieng 4-lane ha Umshyrpi bad ka Tourist Information Centre bad ka Community Office jong ki Rangbah Shnong ka Upper Shillong hajan ka thain.
U Symbud Myntri Rangbah ula pyntip ia kane hadien ka jingleit jurip lang ia ka jaka ban pynieng ia ka Police Station bad Fire Station hynne ka sngi Thohdieng.
U Bah Prestone uba bat ia ka kam Pohiing bad Tnad PWD, ula ong ba ka jingjurip ka dei kaba thmu ban shim rai ia ki jaka na ka bynta ban tei ia kine ki jingtei ba kongsan.
“Ka jingjurip mynta ka sngi ka long tang ban ithuh ia ki jaka” ong u Bah Prestone haba bynrap “Ngin sab uh ia ka Police Station ba pura bad ka Fire Station ba pura ha ka jaka ba lait marjan ka Jingkieng 4-lane ka Umshyrpi”.
U iathuh ba ki Heh Pulit kiba synran ia u, kila mynjur ia kane ka jaka.
“La synran ia nga da u Assistant Inspector General of Police (Administration), SP ka East Khasi Hills bad Shillong City. Kila pynpaw ba kane ka jaka ka dei kaba biang bha ban buh ia kine ki station” ula ong.
Ka jaka kaba ar, u Bah Prestone ula ong, kan dei ka jaka ka ban ai jingshakri ia ki nongwan shangkai pyrthei bad kawei na ka bynta ka jingdonkam jong ka Shnong ka Thaw.
“Ngi don ka jingpyrkhat ba ngin buh ia ka Tourist Information Centre hangtei. Kumjuh ruh, man ka por ka Synjuk ki Rangbah Shnong ka thain Upper Shillong kila kyrpad ia ka Sorkar ba kan ai jaka kumba 2000-3000 square feet na ka bynta ban shna ia ka Office bad kumjuh ruh ka Community hall” ula ong.
“Hadien kane ka jingjurip, ngan sa khot ia ka jingialang jong ka tnad ban kyntur shakhmat ia kine ki project bad ba kin sdang ban shim ia ki sienjam kiba donkam. Ngin pynthikna ba ngin pynurlong ia kine ki jingtyrwa kham kloi kat kaba lah” ula ong.
U Bah Prestone ula ainam ia ka surok 4 lane halor ka jingpynduna ia ka jingdheng kali sha Shillong.
“Naduh Jingkieng Umshyrpi haduh ba kut kane ka surok 4-lane, mynta ka shimpor tang 6-7 minit. Hashuwa ka 4-lane, na 7th Mile sha Jingkieng Umshyrpi ka ju shim por kumba 45 minit, teng teng haduh shi kynta” ula ong.
“Ka jingpyndep ia kane ka 4-lane ka la long ka jingkyrkhu ia ka Jylla, ia ki paidbah, ia ki nongleit nongwan kiba wan bad ba mih na Shillong lyngba kane ka surok. Ngim don jingeh shuh ban sahkut ha kane ka surok mynta” ula bynrap.
Ki dang don ki kam kiba dang sahteng ban pyndep pura da ka kompani, ula ong haba bynrap “Shen u Chief Engineer, National Highway, ha ryngkat ka kynhun jong u, ka Synjuk ki Rangbah Shnong, u BDO ka Mylliem bad ka kompani kin sa iapynlong ia ka jingiajurip lang. Kat haba shem ia kano kano kaba donkam ban pynbeit, kin sa shim rai hato hato hi”.
U Bah Prestone u iathuh ba kane ka Tourist Centre kan ai ia ka jingshakri ia ki nongwan shangkai kiba kwah ban leit sha ki jaka bapher bapher.
“Ha ki khyndiat sngi ban wan, ngan sa khot ia ka jingialang bad ka Tnad Tourism ban iapeit kumno ba ngin tei ia kane ka jingtei ka ban pynsuk ia ki nongwan kai kiba kwah leit sha ki jaka bapher bapher ha ka Jylla jong ngi-sha Dawki, Sohra lane wat sha Nongstoin lane Ri-lum Garo lyngba kane ka thain” ula ong.
Halor ka jingdon marjan ka jaka shipai, u Bah Prestone ula pynpaw ba ka Sorkar kan sa iakren bad ki bor shipai. “Kane ka jaka ka don markhap ka jaka shipai. Ngi don ka jingiadei ba iajan bad ka Sorkar India bad iajan bha ruh bad ki bor shipai” ula ong.
“Ngi ioh ia kane ka jaka jongka surok 4-lane lyngba ka jingiapyrshang lang jong ka Defence Ministry, ka Sorkar Jylla bad ka Ministry of Road Transport. Haba iadei bad ka jaka ba ngi tyrwa pynieng ia ka Tourist Centre, ngin pynthikna ban gin iakren ia ki bor shipai ba kin kyrshan ia ka Sorkar, namar kane kam dei ka jingmyntoi shimet hynrei ka jingmyntoi jong u paidbah” ula ong.
