Ym don kano kano ka jingkhang lad ha ka KAS ia uno uno u dkhot ban rung ha ka kam saiñ pyrthei

Ka jingthmu u Dr DRL Nonglait ban iakhun ia ka elekshon shiteng samoi kadei ka rai shimet: KAS

Shillong Jymmang 28: Ka Khasi Authors Society (KAS) kala pyntip ba hapoh jong ka seng ki don shibun ki dkhot kiba don ha la ki jong ki jong ki seng saiñ pyrthei (political party) bad ka jingpynïasoh u Dr. D.R.L. Nonglait sha ka seng NPP bad ka jingthmu ban ïakhun ïa ka MP ilekshon shiteng samoi kadei ka rai shimet jongu bad kam don jingïasnoh eiei bad ka seng bad ha ka jingpynïaid kam ha ka Seng, kam don kano kano ka jingkhanglad ïa uno uno u dkhot naduh ki nongkitkam haduh kiba dang shu long dkhot ban pynïasoh ne rung sha kano kano ka seng saiñ pyrthei.

Ka KAS kala pynshai ia kane kadei hadien ba kila mih ki jingkynthoh ha ki kot khubor bad ha ki rynsan Social Media pyrshah ia ka seng KAS bad khamtam ka jingrai u President ka KAS u Dr. D.R.L. Nonglait ban ïeng kum u kyrtong jong ka NPP ha ka MP ilekshon shiteng samoi.

“Ka KAS da ka jingsngewkhia, ka pynshai sha ki paidbah ba kadei ka Seng ki Nongthoh kot Khasi kaba kynthup ïa ki dkhot kiba wan na ki jylli bapher bapher. Ka dei ka seng kaba trei na ka bynta ban pynroi, pynïar bad kyntiew ïa ka ktien, ka kolshor bad litereshor Khasi. Haba pynurlong ïa ki jingthmu, ka seng ka ju pynlong ïa ki prokram bapher bapher kynthup ruh ïa ki jingïalang paidbah ha ki por ba donkam ban ai jingpynshai bad ban pan jingkyrshan haba dawa na ka sorkar na ka bynta ban kyntiew ïa ka ktien Khasi. Hooid, u paidbah ula ai shisha ïa ka jingkyrshan baradbah bad ha ki taïew ba la dep, ka sorkar ka la pynurlong ïa ka jingdawa jong ka jaitbynriew kaba la dawa naduh u snem 2023 ïa kaba la lamkhmat da ka Khasi Authors’ Society; kata ka long “Ka jingpynlong ktien sorkar (official language) ïa ka ktien Khasi ha ka Jylla Meghalaya”. Ka jingkhublei ka leit sha u paidbah baroh” la ong u General Secretary ka KAS u Dr. R. P. Kharshiing ha ka kyrwoh khubor.

Ula pynpaw ba hapoh ka seng, ki don shibun ki dkhot kiba don ha la ki jong ki jong ki seng saiñ pyrthei kiba ki kyrshan bad ïakit ïabah ïa ka kam saiñ pyrthei bad don napdeng ki dkhot jong ka seng kiba la long ki MP, MLA, MDC bad kiba la bat ruh ïa ka kyrdan Myntri ka sorkar jylla, Chief Executive Member ha District Council bad bun kiwei de ki kam ba ki bat kum ki nongkitkam ha ka kam saiñ pyrthei.

“Kine ki dkhot ki pynrung ïalade sha ka seng halor ka nongrim ba ka seng ka pdiang sngewbha ïa baroh ki nongthoh ban long ki dkhot jong ka shisien ba ki la thoh ha ka ktien Khasi bad khamtam haba ki don ka jingkitkhlieh ban pynkhlaiñ ïa ka thoh ka pule Khasi. Kumta hapoh ka seng, ngi don ki dkhot kiba don ha ki seng saiñ pyrthei bapher bapher, ki nongïalam niam na ki kynhun niam bapher bapher, ki nongsynshar hima, nongïalam shnong bad ki nongtrei kam sorkar” la ong u Dr RP Kharshiing bad ka bynrap ba ki don ruh ki dkhot kiba trei ha ki kam bapher bapher kum ki doktor, ki nongïasaid aiñ, ki nonghikai skul, college, university, ki nongtrei kam lajong bad kiwei.

“Ha kaba ïadei bad ka jingpynïaid kam ha ka Seng, kam don kano kano ka jingkhanglad ïa uno uno u dkhot naduh ki nongkitkam haduh kiba dang shu long dkhot ban pynïasoh ne rung sha kano kano ka seng saiñ pyrthei ne kano kano ka kynhun ha ka imlang sahlang. Kumta ka jingkynthoh pyrshah ïa ka KAS lane ïa ki dkhot da ki katto katne ki ‘riew shim kabu’ ka long ka kam pynthoh bria ka bym don nongrim bad ki bym tip ruh ïa ka rukom treikam ka seng” la ong u General Secretary ka KAS.

“Ka jingpynïasoh u Dr. D.R.L. Nonglait sha ka seng NPP bad ka jingthmu ban ïakhun ïa ka MP ilekshon shiteng samoi kadei ka rai shimet jongu bad kane kam don jingïasnoh eiei bad ka seng. Namar kata, ka jingjied jong u Dr.D.R.L. Nonglait, President KAS ka dei ka jingjied ba shimet jongu bad ha ka jingpynïaid kam ka seng la kdew shai ba ha ka jingbym don u President, u Vice President u hap ban pynïaid ïa ki kam seng” la ong u Dr RP Kharshiing.

Ka KAS ka pynpaw ruh ka jingsngewnguh sha baroh ki paidbah, ki sengbhalang bad ki seng trei mon sngewbha kiba la ju ai ka jingkyrshan met bad mynsiem ïa ka seng ha ki por baroh bad ka khmih lynti ba ki paidbah ka bri u Hynñiewtrep kin ïai kynshan ha ki sngi ki ban dang wan na ka bynta ban kyntiew ïa la ka ktien nongmei nongpa.