Assam | Ka UCC kan ai ai jingiada ia ki Kynthei bad Shynrang na ki jaidbynriew rit paid, ong u Himanta

Guwahati, Jymmang 26: U Myntri Rangbah ka Assam Himanta Biswa Sarma, u la ong ba ka Uniform Civil Code (UCC) kan wanrah ia ka jingim kaba thymmai ia ki kynthei kiba dei na ki jaitbynriew rit paid, kiba ju mad ia ka jingshah ban bein.

Haba kren ha ka sngi kaba lai jong ka Dorbar ha Iingdorbar Thaw Ain u Sarma u la ong, “Ngi la wanrah ia ka UCC Bill, ka ban ai ia ka jingiada ia ka imlang sahlang ia ki shynrang bad kynthei kiba wan na ki jaidbynriew rit paid.” Kan wanrah ruh ia ka jingshngain bad ka jingiada na ka bynta ki kynthei jong ka jaidbynriew rit paid kiba la shah pynshitom bein naduh ki phew snem,”

U la ong, “Ka UCC kan wanrah ruh ia ka jingim laitluid kaba thymmai na ka bynta ki kynthei rit paid.Ngi la kular ha ki paidbah ba lada ngin wanphai biang sha ka bor, ngin wanrah ia ka UCC,”.

“Nga kynmaw ba ka liang pyrshah bad u nongialam ka Raijor Dal ki la kynthoh ia ngi haba ngi la iakren ban wanrah ia ka UCC ha Assam.Nga la ong ia ki lada phi kwah ban khanglad ia ngi, to khang bad lada phim lah ban khanglad ia ngi, ngin wanrah ia ka UCC ha ka sngi sdang ba nyngkong jong ka dorbar thawain.Ngi la aiti ha ki paidbah ka Assam bad mynta ngi la wanrah ia ka UCC bill ha ka Assambly,” ong u Samra.

“Ki kynthei kiba dei na ka jaidbynriew rit paid ki la shah pyndik bad shah pyndonkam bakla.Hynrei naduh mynta, kin im ka jingim kaba shngain bad kaba laitluid.Nga sngew kmen ba hadien ka Uttrakhand bad Gujarat, ka Assam kan long ka jylla kaba lai ban wanrah ia ka UCC,” u la ong.

U Sarma u la bynrap, “San snem mynshwa, haba ngi la wanrah ïa ka Cattle preservation Act ha Assam, don katto katne ha ka Ïingdorbar bad shabar kiba la kynthoh ïa ngi namar ba ngi pyntreikam ïa ka aiñ kaba khlaiñ pyrshah ïa ki katto katne ki jaitbynriew.Hynrei hadien ka jingkyrpad jong ngi, katto katne ki seng Muslim ha Assam ki la rai ban nym pyndonkam ïa ki masi ban knia ha kane ka Eid, “da kaba burom ïa ki jingsngew jong ki Hindu”.

“Ym shym la don kano kano ka jingthoh niam kaba kdew ba dei ban knia masi.Ka jong ki ka long ka lad kaba pher, bad ha kane ka kynti, katto katne ki nongialam bad ki seng muslim ki la rai ban nym knia ne pyniap masi ha ka por Eid.Nga la pynpaw ia ka jingsngewnguh namar ba la burom ia ki jingsngew niam jong ka jaitbynriew Hindu. Kane ka rai kan pynskhem shuh shuh ia ka jingsuk ha ka jylla Assam,” ong u Sarma.

Shuh shuh u la kyrpad ia kito ki bym pat shim ia ka rai ban “shim jingmut na kiwei pat” bad ban kiar na kaba pyndonkam ia ki masi ban knia ha kane ka kynti.

“Bun ki briew ki la dep ban shim ia kane ka rai”, u la ong, haba pynkynmaw biang ia ka jingkyrpad jong u na ka iing jong ka Assembly.