Dibrugarh, Jymmang 25: Ki pulit jong ka Tinsukia, ki la lap hia kawei ka kynhun kaba la suba ba ka bei pisa ia ki lehnoh hapdeng ki jylla bad ki la kem ia san ngut ki briew, kynthup ia uwei u nongialam ka seng ki samla pule, ha kaba iadei bad katei ka kam.
Ka jingtohkit ka la sdang hadien ki jingtip ba lah ban leh na kawei ka central agency kaba pyni ba ïa ki pisa ba la kynnoh ba la shu dawa ha ka distrik Tinsukia bad la pynpoi beit sha ki kynhun lehnoh kiba don shabar jong ka thaiñ shatei lammihngi.
Ki pulit ki la kem nyngkong ia u Debashish Gohain, u nongthoh khubor uba don jingiadei bad kawei ka news portal. Ha ka jingtohkit, la kynnoh ba u la pynpaw ia ki jingiadei kiba kongsan kiba ialam ia ki nongtohkit sha Maharashtra.
Haba kren bad ki lad pathai khubor, u Additional Superintendent of Police (HQ) u Mrinmoy Das bad u ASP (Crime) u Dinesh Pratap Singh Rathore ki la ïathuh ba u Gohain u la pynpaw ba ïa ka pisa kaba bun la transfer sha u Sheikh Bashir uba dei u nongshong shnong ka Palghar district ha Maharashtra.
U Bashir, uba la iathuh ba u ju leit khah khah sha ka thain shatei lammihngi bad ki ri ba marjan bad la kem ia u da ka jingiarap jong ki pulit ka Maharashtra bad mynta la wanrah ia u sha Assam ban tohkit bniah.
U ASP Das u la ong ba ki nongtohkit ki la lap ruh ba la thep pisa ruh ha ki katto katne ki bank account ha kylleng ki jylla, kaba la pynlong ïa ki Pulit Tinsukia ban phah ïa ki kynhun sha ki jaka bapher bapher kum shi bynta jong ka jingtohkit kaba dang ïaid shakhmat.
Ki jingkhynra kiba hadien ki la pynlong ban kem sa lai ngut ki nongshah kynnoh — U Samar Jyoti Gohain, Assistant General Secretary (AGS) jong ka central unit jong ka All Assam Students’ Union (AASU) bad u nongshong shnong jong ka Tinsukia, u Deepu Chetia Patra na Jorhat, bad u Mrityunjay Konwar na Naharkatia.
Ia kine ki nongshah kynnoh la pynngat ha ki kyndon ain bapher bapher jong ka Bharatiya Nyaya Sanhita (BNS), the Unlawful Activities (Prevention) Act (UAPA), ka Explosive Substances Act, bad ka Arms Act ha kaba iadei bad ka Tinsukia Police Station Case Nos. 98/2026 bad 110/2026.
“Ia kane lah ban ong kum ka inter-state bad ka international terror funding case. U Sheikh Bashir u la ju leit sha ki katto katne ki ri ba marjan bad kumjuh ruh sha ka thaiñ shatei lammihngi.Ka rukom sei bad thep pisa kadei kaba la suba jur bha. Tang hadien ba la tohkit bniah bha ia baroh ki nongshah kynnoh yn sa lah ban tip ia ka jingthmu ba sha lyndet halor ka jingkynnoh bei pisa bad ka kynhun ia kaba la ju lum pisa kan da paw shai bha,” ong u ASP Das.
Ki tyllong khubor ki la iathuh ba ka pisa ba la thep ha ki account la kynnoh ba ka dei ka pisa dawa ba la lum na ka bynta ka seng ba la shah khang ka ULFA-Independent (ULFA-I), ryngkat ka jingbthah ban pynpoi ia ka pisa sha ki account jong u Bashir bad kiwei kiwei.
