Assam | Wanrah ka Sorkar ia ka UCC ha Iingdorbar Thaw ain

Guwahati, Jymmang 25: Hadien ka jylla Uttarakhand bad ka Gujarat, ka Assam ka long ka Jylla kaba lai ban wanrah ïa ka Uniform Civil Code (UCC) Bill hapoh ka iing dorbar thaw ain ka Jylla ha ka sngi Nyngkong.

Ia kane ka ain la wanrah da u myntri ka parliament Affairs u Atul Bora.

Ka kynhun myntri kham mynshwa ka la mynjur ia ka draft jong ka Uniform Civil Code ha shwa ka dorbar ba nyngkong jong ka iing dorbar thawain ka jylla Assam kaba dang shu jied thymmai.

Ka jingthmu jong ka UCC ka long ban pyntreikam ia kawei ka ain kaba iatylli kaba pyniaid ia ka jingshongkha, ka jingiakhlad, ka jinghiar pateng bad ka jingpdiang na ka bynta baroh ki nongshong shnong, khlem da niew ia ka jingngeit.

Ka ain ba la tyrwa ka thmu ban weng ia ki mat kiba kynthup ia ka rta kaba la buh da ka ain ban shongkurim, ka jingshongkha bun tnga, ka jinghiar pateng bad ka jingiadei kaba shongkha shongman.

Ia kane ka bill yn sa iatai bha ha ka 27 tarik u Jymmang.

Ki jaitbynriew riewlum kiba sah ha ki thain lum bad ki thain madan jong ka jylla kin lait na ki kyndon jong ka ain ba la tyrwa.

Ka jingthmu UCC ha Assam kan long tang ban buh ryntih ia ka rta kaba iadei na ka bynta ban shongkurim, ban pynduh noh ia ka jingshongkha bun tnga, ka hok ioh pateng na ka bynta ki kynthei, bad ban pynbeit ia ka jingiadei kaba shongkha shongman, kynthup ia ka jingpynrung kyrteng ia ki jingshongkha bad ki jingiakhlad.

Ka Uniform Civil Code ka dei ka jingtyrwa ha ri India ban thaw bad pyntreikam ia ki ain shimet kiba treikam barabor ia baroh ki nongshong shnong, khlem da khein ia ka niam.
Mynta, ia ki ain shimet jong ki kynhun niam bapher bapher la synshar da ki jingthoh niam jong ki hi.Kine ki ain ki kynthup ia ka jingshongkha, ka jingiakhlad, ka jinghiar pateng, ka jingshim khun bad ka jingsumar.

Katba ki Article 25 haduh 28 jong ka Riti Synshar jong ka ri India ki pynthikna ia ka jinglaitluid ha ka niam bad ailad ia ki kynhun niam ban pyniaid hi ia ki kam jong ki, ka Article 44 ka bthah ia ka jylla ban ialeh ban ioh ia ka ain paidbah kaba iadei (common civil code) na ka bynta baroh ki nongshong shnong katba ka dang thaw ia ki polisi jong ka ri.