Shillong, Jymmang 22: Iaka Lympung State Level Inter-School Athletics Meet 2026 ba la pynlong da ka Directorate of Sports and Youth Affairs, ha ryngkat ka jingiatreilang bad ka Meghalaya Athletics Association ha SAI STC Shillong, NEHU Campus, la pynkut noh haba iaka nam jop la rah da ka East Khasi Hills kum ka champion.
Haba kren ha ka jingïalang pynkut iaka lympung, u Myntri ka tnad Sports and Youth Affairs u Bah Wailadmiki Shylla u la ai khublei ïa ki nongpynïaid, ki nongïalehkai bad ki nongkitkam kiba la lah ban pynïaid beit ïaid ryntih ïa kane ka lympung ialehkai bad u la ïaroh ruh ïa ki samla kiba ïashim bynta haki jingialehkai bapher bapher.
Haba kren sha ki samla, u Myntri u la ong ba uwei pa uwei u nongiashim bynta u dei ban sngew sarong namar ba u la poi sha ka jingiakop haba bynrap ba ki la dep ban pynshisha ialade kum ki nongialehkai kiba angnud bad kiba kut jingmut ban wanrah ia ka burom sha ka iing ka sem, ki skul, ki district bad ka jylla.
U la pynkynmaw ïa ki nongïashim bynta ba watla ka jingjop takma ka lah ban long kaba shipor, hynrei ka jinglong ryntih, ka jinglong ban iai bteng iaka jingïalehkai kan sah bad ki ha ka jingim jong ki baroh kawei.
U la kdew ba wat hapdeng ki jingeh ha ki jingtei iaki jaka ialehkai, ka Sorkar ka la pyniair ïa ki jaka ïalehkai ha kylleng ka jylla Meghalaya hapoh ka jingïalam jong u Myntri Rangbah ka Jylla Conrad K Sangma.
U Bah Wailad u la pyntip ba ki artificial athletic track ki la dep ban shna ha Shillong bad ha Wahiajer, katba kum kine ki projek ki dang iaid shakhmat ha Tura, Mawkyrwat, Baghmara bad kiwei ki district.
U la ong ba ka jingthmu jong ka sorkar ka long ban pynthikna ba man la ka district kan don ia ki lad bad ki jaka ialehkai kiba biang ban iarap ia ki samla ialehkai ban pyntbit bad pyni ia ka sap ka phong jong ki.
Ka East Khasi Hills kala ioh iaka nam lahduh bad ka ioh ruh ia ka nam lahduh jong ka Best Boys Team, katba ka North Garo Hills ka la wan ha ka kyrdan ba ar.
Haka thup girls’ category, ka East Khasi Hills ka la ïoh ban khur ïa ka nam lahduh jong ka Best Girls Team, ha kaba ka West Jaiñtia Hills ka la wan ba ar.
U Ewandame Mark Syiemlieh na East Khasi Hills ka la shah jied kum ka Best Athlete ha ka kyrdan Under-14 Boys haka High Jump, katba ka Lamsaka Dkhar na East Jaiñtia Hills ka la jop ïa ka Under-14 Girls ha ka Long Jump.
U Highbornson Muksor na East Jaiñtia Hills ua ioh ka nam Best Athlete ha ka kyrdan Under-16 Boys, katba ka Amandy Rumnong na East Khasi Hills ka la ïoh ban rah ïa ka nam lahduh jong ki Under-16 Girls. Ha ka kyrdan Under-18, u Cherim Ch Sangma ka North Garo Hills ula ioh Best Athlete boys’ bad ka Tusame N Marak ka East Khasi Hills ka ioh haka Girls.
